Fréttir & tilkynningar

SSV-þróun og ráðgjöf og Símenntunarmiðstöð Vesturlands í samvinnu við Útflutningsráð Íslands standa fyrir námskeiði í markaðssetningu á netinu, en það er byggt á samnefndri bók sem kom út á dögunum.   Kennarar eru Guðmundur Arnar, markaðsstjóri hjá Icelandair og Kristján Már hjá Nordic eMarketing. 

Skessuhorn 3. mars 2010: Ásbjörn Óttarsson alþingismaður hefur á Alþingi mælt fyrir frumvarpi um breytingar á lögum um stjórn fiskveiða.  Þar leggur hann til að auk Hafrannsóknastofnunar skuli aflaráðgjafarnefnd veita sjávarútvegs- og landbúnaðarráðherra ráðgjöf um heildarafla fisks í lögsögunni. Ráðherra skipi þessa nefnd og skuli hún við tillögugerð sína m.a. byggja á reynslu og þekkingu sjómanna og þeim gögnum sem verða til við störf  þeirra á vettvangi. Nefndin leggi áherslu á nauðsyn þess að nýta fiskistofna með skynsamlega nýtingu að leiðarljósi og að samræmis sé gætt milli tegunda.

Ýmislegt hefur verið á döfinni hjá Hestaeigendafélagi Grundarfjarðar frá áramótum, meðal annars spilakvöld, sunnudagsreiðtúrar og kaffi á eftir.  Haldin var rekstrardagur þar sem var farið seinnipart föstudags og hrossin rekin út að Kirkjufellsbrekku og til baka með tilheyrandi hamagangi.  Greinilegt var að hrossunum leiddist það ekkert að geta teygt aðeins úr sér án knapa.  Á eftir var boðið upp á súpu og brauð, horft á videó og spjallað fram á kvöld.  Allmargir félagar eru á reiðnámskeiði hjá Lárusi Hannessyni sem er einu sinni í viku og framundan er fyrirlestur um litaerfðir hesta, einnig páskamót og árshátíð.

Skessuhorn 2. mars 2010   Grundarfjörður er nú fullur af síld og bæst hefur í dag frá degi. Heimildir Skessuhorns herma að ef miðað sé við fyrstu þykktarmælingar sé ekki undir hálfri milljón tonn af síld þar núna, sem er athyglisvert í ljósi þess að aðeins hafa verið leyfðar veiðar á 47.000 tonnum síðan í haust. Síldartorfurnar eru mjög þéttar og ná frá botni upp á yfirborðið og síldargangan nær alveg inn í Kolgrafarfjörð. Fuglinn tínir síld af sjónum og háhyrningar elta síldina upp undir fjörur. Ekkert má veiða því kvótinn er búinn og fiskifræðingar hafa haft vara á sér vegna sýkingar í síldinni.

Skessuhorn 2. mars 2010: Dagný og Sesselja voru sæmdar starfsmerki UMFÍ.Um liðna helgi var héraðsþing HSH haldið í Stykkishólmi. Þingið var vel sótt og starfssamt. Gestir þess voru Helga Guðrún Guðjónsdóttir formaður UMFÍ, Sæmundur Runólfsson framkvæmdarstjóri UMFÍ og Sigríður Jónsdóttir framkvæmdarstjórn ÍSÍ.  Dagný Þórisdóttir og Sesselja Pálsdóttir í Snæfelli voru sæmdar starfsmerki UMFÍ og Þorbergur Bæringsson Snæfelli var sæmdur Gullmerki ÍSÍ.  Þingforsetar voru Dagný Þórisdóttir og Hjörleifur K. Hjörleifsson og stýrðu þau þinginu af mikilli röggsemi. Meðal annars voru samþykktar úthlutunarreglur fyrir stjórn vegna styrkja, fækkun þingfulltrúa og sektir vegna seinkunar á skilum í Felix.

Um næstu helgi 6. – 7. mars mun Bjarni Einarsson verða með annað handboltanámskeið fyrir börn og unglinga. Er þetta sama verð og síðast kr. 500,- fyrir tímann.  

Síðastliðna helgi hélt blaklið kvenna í Grundarfirði á Hvolsvöll að keppa í 3. deild í blaki.  Var þetta önnur helgin af þremur.  Voru þær  í 3. sæti eftir fyrsta mótið sem haldið var í Mosfellsbæ í október.  En nú gekk allt upp hjá stelpunum. Þær komu sáu og sigruðu, því þær unnu alla sína  leiki sem voru fimm talsins með 2 – 0 og er það frábær árangur.  Munu þær í framhaldinu keppa um 1. – 6. sæti í byrjun apríl og vonum að allt gagni eins vel og smurt og nú um helgina.  Óskum þeim til hamingju með árangurinn.

Hin árlega Lokahátíð Stóru Upplestrarkeppninnar í grunnskólunum hér á Snæfellsnesi verður haldin miðvikudagskvöldið 10. mars n.k, kl. 20.00 í Grundarfjarðarkirkju.  

Fiskistofa auglýsir eftir umsóknum um byggðakvóta til fiskiskipa í Grundarfjarðarbæ á fiskveiði 2009/2010 á grundvelli reglugerðar um úthlutun byggðakvóta til fiskiskipa nr. 82, 29. janúar 2010 og sérstakra úthlutnarreglna sem settar hafa verið fyrir Grundarfjarðarbæ.   Umsóknum skal skilað til Fiskistofu á eyðublaði sem er að finna á heimasíðu stofnunarinnar, og þar eru ofangreindar reglur einnig aðgengilegar. Umsóknarfrestur er til og með 15. mars 2010. Hér má nálgast auglýsinguna.

Nú er skólahreystivika hjá nemendum grunnskólans og föstudaginn 26.febrúar verður sett upp skólahreystibraut í íþróttahúsinu og munu eldri nemendur skólans spreyta sig á henni. Ný líkamsræktartæki sem starfsdeildin smíðaði verða einnig tekin í notkun.   Foreldrum og öllum sem áhuga hafa á er boðið að koma og fylgjast með krökkunum  frá kl. 10.30 og fram að hádegi.   Vonumst til að sjá sem flesta.   Skólastjóri