Fréttir & tilkynningar

,,Bestu fundirnir eru oft þeir sem ekki eru haldnir”, segir einhvers staðar í stjórnunarfræðum og er með því vísað til þess að oft sé gott að sleppa við að halda fundi og afgreiða mál eftir öðrum og skjótvirkari leiðum.   Á vegum bæjarstjórnar og -starfsmanna er oft töluvert um fundi, eðli málsins skv. þar sem margir aðilar koma oft að málum og ekki er hægt að afgreiða málefni með eins manns ákvörðun. Samráð og samstarf gjarnan nauðsynlegt, fyrir utan að vera lögbundið í sumum tilvikum.

Upplestrarkeppni 7. bekkinga grunnskólanna á Snæfellsnesi verður haldin á Hellissandi mánudaginn 10. mars n.k. kl. 20.00 í Grunnskólanum á Hellissandi.  Forkeppni nemenda í Grunnskóla Grundarfjarðar verður hins vegar haldin í kvöld fimmtudaginn 27. febrúar kl. 18.00 í Grundarfjarðarkirkju. Þar munu nemendur 7. bekkjanna keppa innbyrðis um hverjir komast í keppnina á Hellissandi.  Foreldrar og aðrir bæjarbúar eru hvattir til að mæta og fylgjast með nemendum.

Síðustu tvær helgar stóð Samband íslenskra sveitarfélaga í samvinnu við landshlutasamtök sveitarfélaga fyrir námskeiðum fyrir sveitarstjórnarmenn á samtals 12 stöðum á landinu.   Námskeiðin voru sniðin fyrir kjörna fulltrúa í sveitarstjórnum en nýttust ennfremur starfsmönnum sveitarfélaga. Fyrirlestrar voru m.a. sendir í gegnum fjarfundabúnað til námskeiðsstaða.

Samkomulag menntamálaráðuneytis og iðnaðarráðuneytis um verkefni á sviði byggðamála   Tómas Ingi Olrich, menntamálaráðherra, og Valgerður Sverrisdóttir, iðnaðarráðherra, undirrituðu á Akureyri í morgun samkomulag um átak í uppbyggingu menntunar og menningar á landsbyggðinni.  

Frétt tekin af heimasíðu Grunnskóla Grundarfjarðar;   Tveir kennarar voru að útskrifast úr fjarnámi Kennaraháskólans föstudaginn 14. febrúar.  Ásta Ólafsdóttir var að bæta við sig í námi en var þó áður með kennsluréttindi og Kolbrún Reynisdóttir var að útskrifast með kennararéttindi, B.Ed gráðu. Af þessu tilefni fengu þær afhentan blómvönd frá skólanum.   Þeim Ástu og Kolbrúnu eru færðar hamingjuóskir frá bæjarstjórn og starfsmönnum Grundarfjarðarbæjar.  

Álagningu fasteignagjalda er nú lokið og hafa álögð gjöld verið send Búnaðabankanum til innheimtu, en fyrsti gjalddagi er 1. mars n.k.  Gjalddagar verða 7 eins og verið hefur undanfarin ár og gjaldendum er boðinn 3% staðgreiðsluafsláttur ef fasteignagjöldin eru staðgreidd fyrir 31. mars n.k.  

Það er ávallt markmiðið að rekstur sveitarfélagsins sé sem hagkvæmastur, að gætt sé kostnaðaraðhalds og reynt að finna leiðir til aukinnar hagkvæmni . Í tengslum við fjárhagsáætlunargerð ársins 2003 ákváðu forstöðumenn stofnana sveitarfélagsins að hafa með sér samráð um það hvernig ná mætti aukinni hagkvæmni í rekstrinum. Ákveðið var að setja á laggirnar litla nefnd sem gengur undir því ófrumlega heiti ,,sparnaðarnefndin”, en í henni sitja fulltrúar frá nokkrum stofnunum sveitarfélagsins.  

Á fundi bæjarstjórnar sem lauk upp úr kl. 21.00 í kvöld var, eftir umræður um málið, samþykkt eftirfarandi ályktun bæjarstjórnar um ástand og horfur í skelfiskveiðum í Breiðafirði;  

Eyrbyggjar, hollvinasamtök Grundarfjarðar, slá hvergi slöku við og héldu sinn 40. stjórnarfund þann 4. febrúar sl. Stjórnin hittist mánaðarlega og um þessar mundir er hún á fullu við að skipuleggja og viða að sér efni í næsta hefti í ritröðinni ,,Fólkið, fjöllin, fjörðurinn” – safn til sögu Eyrarsveitar.  

Hönnuðir íbúða fyrir eldri borgara eru að leggja lokahönd á hönnun og frágang teikninga. Verið er að ákveða gólfefni, liti og viðartegundir í innréttingum, fyrirkomulag tækja í eldhúsi og fleira í þeim dúr. Hönnuðir settu sér að vera búnir fyrir lok febrúar með allar teikningar en af hálfu bæjarins er ýtt á eftir að þeir ljúki vinnu sinni sem allra fyrst, til að unnt sé að koma útboði af stað.