Fréttir & tilkynningar

Grunnskóla Grundarfjarðar barst gjöf frá KB banka í Grundarfirði í dag. Olga Einarsdóttir afhenti skólanum 10 taflsett og  klukkur fyrir hönd bankans og er þetta kærkomin gjöf fyrir skákáhugamenn skólans. Hér að neðan fylgja myndir af nokkrum áhugasömum skákmönnum og búast má við að fleiri bætist í hóp þeirra sem taka skák í frímínútunum. Grunnskóli Grundarfjarðar færir KB banka bestu þakkir fyrir gjöfina.   Ingólfur Örn, Heimir Þór, Albert Þórir og Erling ánægðir með gjöfina frá KB banka. Á myndinni má einnig sjá Olgu Einarsd. og Önnu Bergsd. fylgjast með nemendum leika skák.  

Hafsteinn hafnarvörður, Björg hafnarstjóri og Sigríður forseti bæjarstjórnar gæða sér á tertunni   Febrúarmánuður 2005 var sannarlega annasamur í Grundarfjarðarhöfn. Alls bárust 2.340 tonn að landi og er það mesta magn landaðs afla í einum mánuði, stærsti mánuður hingað til var júní 2001 en þá var landað 2.291 tonni á höfninni.   Heildarafli í febrúar á síðasta ári var 1.828 tonn og árið 2003 var landað 1.248 tonnum í sama mánuði.     Janúarmánuður sl. var ennfremur stærsti janúarmánuður hingað til, í aflamagni, og í janúar og febrúar hafa samtals borist 4.011 tonn að landi í höfninni. Það munu vera um 27% af heildarafla alls síðasta árs og 32% af heildarafla ársins 2003.   Af þessu tilefni mætti hafnarstjóri með dýrindis marengstertu (hnallþóru frá dömunum á 59!) niðrá hafnarvog í morgun – að sjálfsögðu með áletruninni 2340 tonn!

Á fundi íþrótta- og tómstundanefndar í dag voru samþykkt eftirfarandi drög að reglum um kjör íþróttamanns Grundarfjarðar. Íþróttafélögum verða send drögin til umfjöllunar og jafnframt geta lesendur heimasíðunnar sett ábendingar í reitinn hér að neðan.   Sjá fundargerð nefndarinnar    

  Á síðasta fundi fræðslu- og menningarmálanefndar, þann 14. febrúar, var hafin vinna við að skoða starfsemi bókasafnsins og stefnir nefndin að því að leggja fram tillögur til bæjarstjórnar um framtíðarstarfsemi safnsins, þjónustu þess og samstarf við aðrar stofnanir bæjarins eða jafnvel samrekstur.    

Togbáturinn Þorvarður Lárusson SH 129 frá Grundarfirði, sem Samherji leigir, kom að landi í Grundarfirði 24. febrúar, með rúmlega 30 tonna afla. Skipið hefur þar með komið að landi með um 120 tonn úr þremur veiðiferðum á einni viku, þar af fyrstu tvö skiptin með fullfermi.   Þetta má lesa í frétt á vef Samherja hf.

Á fundi bæjarráðs Grundarfjarðar í gær 23. febrúar voru teknar fyrir umsóknir um byggðakvóta, skv. reglum bæjarstjórnar þar að lútandi. Bæjarráð samþykkti samhljóða eftirfarandi úthlutun:    

Berglind Rósa skammtar Sigurbjörgu Pétursd. á diskinn Haustið 2003 var í fyrsta skipti boðið upp á heitan mat í hádeginu fyrir nemendur og starfsfólk grunnskólans. Veitingahúsið Kaffi 59 sér um matseldina og þykir fyrirkomulagið ganga mjög vel. Um 127 eru nú skráðir í mat. Þær stöllur í Kaffi 59 koma með matinn í skólann og skammta nemendum á diska, en nemendur matast í skólastofum sínum.  Meðfylgjandi eru myndir frá hádegissnæðingi nú í febrúar.

Eins og flestum er kunnugt verður efnt til íbúaþings Grundfirðinga þann 5. mars n.k. í hinu nýja húsnæði Fjölbrautaskóla Snæfellinga. Dagskráin hefur litið dagsins ljós og má nálgast hana hér. Ýmis atriði er varða framtíð Grundarfjarðar verða rædd á þinginu, s.s skipulagsmál og fjölskyldustefna. Hér má sjá nánari útlistun á umfjöllunarefnum þingsins.

Þeir voru hressir kapparnir á Munda SH í gær þegar þeir komu frá því að leggja út gildrur til veiða á þorski til áframeldis.   Guðmundur Runólfsson hf. fékk á dögunum úthlutað 70 tonnum úr rannsóknasjóði AVS (aukin verðmæti sjávarafla) til tilrauna á áframeldi á þorski á yfirstandandi fiskveiðiári, en að þessu sinni var úthlutað 500 tonnum til 11 fyrirtækja á landinu. Fyrirtækið tekur einnig þátt í tilraunum og þróun á veiði- og eldisbúnaði í samvinnu við aðra aðila. G. Run. hf. hóf tilraunir í þorskeldi í ársbyrjun 2003, en undirbúningur hófst þó fyrr.   Sjá nánar á vefsíðu sjávarútvegsráðuneytisins og á vef Guðmundar Runólfssonar hf. um þorskeldið   

Það er óhætt að segja að miklar annir hafi verið í Grundarfjarðarhöfn að undanförnu og reyndar það sem af er árinu. Í dag, 22. feb., hafa um 1750 tonn borist að landi það sem af er febrúarmánuði, en í febrúar í fyrra var landað 1828 tonnum. Janúarmánuður sl. var sá stærsti í aflatölum þess mánuðar fram að þessu, heildarafli var 1.671 tonn samanborið við 1.248 tonn á sama tíma í fyrra, en á liðnum árum hefur um 1000 tonnum verið landað í janúarmánuði. A.m.k. fimm aðkomuskip hafa landað hér í febrúar og hafa sum hver haft hér viðkomu reglulega að undanförnu.   Akureyrin EA í Grundarfjarðarhöfn 22. febrúar