Fréttir & tilkynningar

Næstkomandi miðvikudag 30.mars 2011 verður haldinn opinn vinnufundur í Klifi, Snæfellsbæ frá kl 17:30-21:00.   Á fundinum verður fjallað um tækifærin sem felast í því að hafa aðgang að þjóðgarði á svæðinu, og munu ráðgjafar frá Alta stýra fundinum.   Kynnt verða ýmis dæmi frá erlendum þjóðgörðum, þar sem vel hefur tekist til með uppbyggingu og eflingu byggðar í nágrenninu og rætt um hver er sérstaða þjóðgarðsins á Snæfellsnesi.

Stærðfræðikeppni grunnskólanna á Vesturlandi var haldin  á Akranesi fyrir stuttu. 10 efstu nemendum úr árgangi sem tóku þátt í keppninni er boðið á verðlaunaafhendingu laugardaginn 2. apríl í Fjölbrautaskóla Vesturlands ásamt foreldrum. 6 nemendur úr Grunnskóla Grundarfjarðar voru meðal 10 efstu og er það frábær árangur. Fjöldi keppenda tók þátt í keppninni á Vesturlandi allt frá Kjalarnesi að Hólmavík. 

Aðalfundur Félags atvinnulífsins í Grundarfirði verður haldinn fimmtudaginn 7. apríl nk.,  kl. 17:00 í Sögumiðstöðinni, ekki 29. mars eins og áður var auglýst.   Dagskrá: 1.   Skýrsla stjórnar 2.   Afgreiðsla reikninga 3.   Kosning formanns 4.   Kosning annarra stjórnarmanna og varamanna 5.   Kosning tveggja skoðunarmanna ársreikninga og eins til vara 6.   Tillaga stjórnar um verkefni og fjárhagsáætlun 7.   Ákvörðun um árgjöld 8.   Breytingar á lögum félagsins 9.   Önnur mál   Vonumst til að sjá sem flesta.   Stjórnin 

Æfingar í karate falla niður í dag vegna veikinda.   kv Dagný Ósk 

  Lúðrasveit Tónlistarskóla Grundarfjarðar heldur stórtónleika fimmtudaginn 24. mars og verða þeir í sal Fjölbrautaskóla Snæfellinga klukkan 19:30. Á meðal laga á efnisskránni má nefna lög eftir meistaranna í Coldplay og Muse, ásamt mörgum öðrum listamönnum sem eiga lög á þessum sannkallaða stórviðburði í menningarlífi Grundarfjarðar.   Ýmsir gestir leika og syngja með lúðrasveitinni en þar má helst nefna  Jóhönnu Guðrúnu. Á árinu 2010 voru einnig haldnir stórtónleikar þar sem kvikmyndatónlist fékk að hljóma en nú er það rokkið sem hljómar næstkomandi fimmtudagskvöld. Þetta er eitthvað sem enginn má missa af en þess má geta að vel yfir 200 manns mættu á síðustu tónleika sveitarinnar.

  Stjórn Félags atvinnulífsins í Grundarfirði (FAG) vill þakka kærlega öllum þeim sem komu að sýningunni Heimurinn okkar síðastliðinn laugardag, sýnendum, unglistamönnum og gestum. Yfir fjörutíu aðilar tóku þátt og voru básarnir hver öðrum glæsilegri. Var mál manna að sýningin sýndi ekki bara svart á hvítu hina miklu fjölbreytni í atvinnulífinu hér á svæðinu heldur einnig jákvæðni og kraft íbúanna. Hér má sjá skemmtilegar myndir frá sýningunni sem Tómas Freyr Kristjánsson tók. Þær tala sínu máli.

 

  Myndakvöld verður haldið í Sögumiðstöðinni fimmtudaginn 17. mars kl. 20:00.   Eyþór Björnsson segir frá ferðum sínum um Miðausturlönd.   Enginn aðgangseyrir. Kaffi Emil verður opið.

Aðalfundur Búnaðarfélags Eyrarsveitar verður haldinn á Hótel Framnesi, sunnudaginn 20 mars næstkomandi og hefst kl. 14.00. Venjuleg aðalfundarstörf. Stjórnin. 

Af vef Skessuhorns 15.3.2011   Atvinnuvega- og samfélagssýningin „Heimurinn okkar“ verður haldin í Grundarfirði nk. laugardag 19. mars. Það er FAG, félag atvinnulífsins í Grundarfirði sem stendur fyrir sýningunni. Þegar Skessuhorn ræddi við Jónas Víði Guðmundsson markaðsfulltrúa Grundarfjarðar í gær var sýnt að þátttaka yrði góð á sýningunni. Um 40 aðilar höfðu þá fest sér sýningarbás, þar af 21 fyrirtæki og stofnanir og 15 félagasamtök, fyrir utan svokallaða aðra aðila, en þeir eru m.a. Fjölbrautaskóli Snæfellinga sem verður með stóran kynningarbás og aðstandendur sýningarinnar, FAG, en það félag var stofnað árið 1997.