Fréttir & tilkynningar

      Í gær miðvikudaginn 26. maí fóru elstu nemendur Leikskólans Sólvalla í Ævintýraleit (elstubarnaferð). Að venju var farið út að Bergi og stóð ferðin yfir frá kl. 9:00 - 19:00. 

  Góðir gestir frá Frakklandi eru í heimsókn í Grundarfirði.  Þetta er fólk frá Paimpol á Bretagne skaga sem er vinabær Grundarfjarðar.  Fulltrúi frá bæjarstjórninni í Paimpol er með í för ásamt forsvarsfólki "Grundapol" sem eru samtök vina Grundarfjarðar.  Í tilefni af heimsókninni var vígður garður sem ætlaður er sem framtíðar útivistarsvæði bæjarins og var honum gefið heitið "Paimpol garður".  Gestirnir fóru að bretónska krossinum, voru við minningarathöfn í Grundarfjarðarkirkju um franska sjómenn sem fórust við Íslandsstrendur sem sr. Aðalsteinn Þorvaldsson annaðist ásamt organista og með aðstoð frá frönskum skiptinema, undirrituð var yfirlýsing um vinabæjarsambandið, heimsóttu GRun hf. og fóru í hringferð um Snæfellsnesið.  Frakkarnir buðu fulltrúum bæjarstjórnar og fleirum í móttöku í Hótel Framnesi um kvöldið.  Hópurinn mun svo halda frá Grundarfirði í fyrramálið í hringferð um landið. Hér má sjá fleiri myndir.  

Í þessari viku verður frí frá æfingum á vegum UMFG nema að þjálfarar gefi annað upp. Æfingar hefjast aftur 1 júní.   Stjórn UMFG 

Skessuhorn 23. maí 2010: Föstudaginn 21. maí brautskráði Fjölbrautaskóli Snæfellinga 14 nemendur, alla með stúdentspróf. Af  náttúrufræðibraut útskrifuðust Lilja Margrét Riedel, Sveinbjörn Ingi Pálsson og Sæbjörg Lára Másdóttir. Af félagsfræðabraut útskrifuðust Anna Júlía Skúladóttir, Ásthildur E. Erlingsdóttir, Egill Guðnason, Erla Lind Þórisdóttir, Eva Lind Guðmundsdóttir, Guðmundur Haraldsson, Hallfríður Guðný Ragnarsdóttir, Lárus Gohar Kazmi, Ólafur Hrafn Magnússon, Steinar Darri Emilsson og Sunna Björk Skarphéðinsdóttir. 

 Skessuhorn 22. maí 2010: Fyrstu gestirnir koma upp nýja landganginn. Ljósm. sk.Klukkan 11 í morgun kom fyrsta skemmtiferðaskip sumarsins til Grundarfjarðar. Það nefnist Athena, er ítalskt en farþegar þess enskir. Áætluð er koma 13 skipa í sumar, flest munu eiga viðdvöl í júlí, eða sjö skip og þar á meðal tvö helgina sem bæjarhátíðin Á góðri stundu verður haldin í lok mánaðarins. Síðasta skipið kemur síðan 12. september.  Runólfur Guðmundsson formaður hafnarstjórnar tók á móti farþegum við komuna í Grundarfjörð í morgun og færði fyrstu gestunum sem stigu á land á nýja hafnarsvæðið blóm og gjafir. Með skipinu eru 540 farþegar og eru 300 þeirra nú í skoðunarferð um Snæfellsnes á rútum. Skipið lætur síðan úr höfn klukkan 23 í kvöld eftir 12 tíma stopp. Áður en haldið verður um borð gefst farþegum kostur á að njóta góða veðursins, fara í verslanir, kaupa handverk, veitingar og annað sem í boði er fyrir ferðamenn í Grundarfirði.

Laugardaginn 22. maí er opið frá klukkan 13:00 - 17:00, sunnudaginn 23. maí er lokað og mánudaginn 24. maí er opið frá klukkan 13:00 - 17:00. 

Í næstu viku mun hópur frakka frá vinabæ Grundarfjarðar í Paimpol í Frakklandi koma í heimsókn til Íslands og skoða landið.  Hópurinn kemur til Grundarfjarðar að kvöldi mánudagsins, annars í hvítasunnu.  Á þriðjudag,  25. maí, er skipulögð dagskrá og er heimamönnum velkomið að taka þátt.  Um morguninn verður farið að bretónska krossinum á Grundarkampi og síðan kl. 10.15 verður athöfn í kirkjunni til þess að minnast sæfarenda frá Paimpol.  Því næst kl. 10.45 er fyrirhugað að vígja gróðurreit á opna svæðinu neðan Ölkelduvegar og verður reitnum gefið nafnið Paimpol garður.  Lúðrasveit Tónlistarskóla Grundarfjarðar mun spila og fulltrúar vinabæjanna munu flytja ávörp.  Síðar um daginn munu gestirnir heimsækja fiskvinnslu GRun og fara í skoðunarferð um Snæfellsnes. Nánari umfjöllun verður um heimsóknina á heimasíðu Grundarfjarðarbæjar Sigríður Finsen Forseti bæjarstjórnar Grundarfjarðar  

Skessuhorn 19. maí 2010: Runólfur skoðar síld úr höfninni. Ljósm. sk.Í dag voru menn við veiðar á síld í höfninni í Grundarfirði. Voru þetta þeir Runólfur Guðmundsson og Pétur Erlingsson en þeir voru að vinna að rannsóknarverkefni fyrir Hafrannsóknastofnun sem felst í að athuga sýkingu í síldinni. Mest öll síldin er farin úr firðinum en þó er talvart af síld í höfninni að sögn Runólfs. Hafrannsóknastofnun er meðal annars að athuga hvort sú síld sem eftir er yfirgefi ekki fjörðinn sökum sýkingar.  

Mynd Sverrir Karlsson Þriðjudaginn 18. maí sl. var nýtt móttökusvæði fyrir ferðamenn af skemmtiferðaskipum ásamt nýrri flotbryggju vígt við hátíðlega athöfn í Grundarfjarðarhöfn.  Við athöfnina var gerð grein fyrir helstu kostnaðar- og magntölum í framkvæmdinni sem samtals hefur staðið yfir í þrú ár.  Framkvæmdin fólst í dýpkun hafnarinnar, gerð sjóvarnargarðs sem er með öldudempandi fláa, kaupum og niðursetningu flotbryggju, uppsteypu landstólpa, uppsetningu á landgangi, gerð gangstígar og plana fyrir ferðafólk og fólksflutningabíla.  Svæðið hefur verið afmarkað með "vitum" og komið var fyrir bekkjum og borðum fyrir ferðafólk og heimamenn.  Öll framkvæmdin kostaði á framkvæmdatímabilinu 33 miljónir króna.  Styrkur fékkst frá iðnaðarráðuneytinu í þetta verkefni að fjárhæð kr. 6,3 milljónir.  Mannvirkin voru blessuð af sóknarprestinum Sr. Aðalsteini Þorvaldssyni.  Tveir fullorðnir frumkvöðlar í Grundarfirði þeir Guðmundur Runólfsson, útgerðarmaður og skipstjóri og Elís Guðjónsson, fv. hafnarvörður, klipptu á borða og vígðu þar með hina nýju aðstöðu formlega.  Viðstöddum var boðið í kaffi og meðlæti á svæðinu eftir athöfnina.  Hér má sjá myndir af vígslunni. Myndir frá Sverri Karlssyni Myndir frá Hirti H Kolsöe/Jóni P Péturssyni

Sameiginlegur kór félaga úr Grundarfirði og Stykkishólmi sem hefur heitið karlakórinn Kári verða með vortónleika á Snæfellsnesi sjá auglýsingu hér