Fréttir & tilkynningar

  Alþjóðlega stuttmyndahátíðin Northern Wave var haldin um síðustu helgi í Grundarfirði fjórða árið í röð. Fjölmörg verðlaun voru veitt en þó ekki aðeins fyrir stuttmyndir. Á laugardagskvöldið var haldin í annað sinn hin vinsæla fiskisúpukeppni hátíðarinnar í húsi Djúpakletts við Grundarfjarðarhöfn. Hátt í 300 manns mættu, bæði gestir og bæjarbúar, og 8 súpulið kepptu um bestu fiskisúpuna.

Laus til leigu íbúð nr. 101 að Hrannarstíg 18. Íbúðin er tveggja herbergja 69,2 fermetrar. Íbúðin er búsetuíbúð fyrir eldri borgara með hlutareign leigutaka. Nánari upplýsingar fást á skrifstofu Grundarfjarðarbæjar, sími 430 8500. Umsóknarfrestur er til fimmtudagsins 17. mars. n.k. skrifstofustjóri  

Eins og margir vita líður nú senn að sýningunni „Heimurinn okkar“ í Grundarfirði. Sýningin verður vettvangur fyrir fyrirtæki, félagasamtök og stofnanir á svæðinu til að kynna starfsemi sína og ágæti fyrir heimamönnum og nærsveitungum, ásamt því að gefa innsýn í menningarlífið. Sýningin verður haldinn laugardaginn 19. mars nk. í Fjölbrautaskóla Snæfellinga, frá kl. 13:00-17:00.   Undirbúningur gengur vel og hafa nú þegar fjölmargir aðilar skráð sig til leiks. Nú fer hver að verða síðastur að skrá sig því skráningarfrestur rennur út mánudaginn 7. mars nk.   Það skal sérstaklega tekið fram að það kostar ekkert að vera með.

Fjölbrautaskóli Snæfellinga í samvinnu við Fjölbrautaskóla Vesturlands á Akranesi hefur ákveðið að bjóða eins árs nám í bygginga- og málmiðngreinum næsta skólaár. Á haustönn 2011 verða kenndar almennar bóklegar greinar ásamt grunnteikningu, upplýsingatækni og verktækni grunnnáms. Verktækni grunnnáms er verklegt nám sem fer að stærstum hluta fram við FSN ásamt námskeiðum á verkstæðum FVA.

Námskeið fyrir verðandi heimsóknarvini verður haldið á vegum Rauða krossins í Grundarfirði, fimmtudaginn 10. mars, frá klukkan 13.00 til 16.00 í safnaðarheimilinu. Námskeiðið er frítt og boðið verður upp á kaffiveitingar. Áhugasamir eru hvattir til að koma og hlusta, hvort sem þeir hugsa sér að verða heimsóknarvinir eða þiggja heimsóknir.

Af vef Skessuhorns 25/2/2011:   Ferðafélag Snæfellsness fékk nýverið hálfa milljón króna styrk frá Ferðamálastofu við lagningu langrar gönguleiðar á Snæfellsnesi. Um er að ræða um áttatíu kílómetra langa leið frá Ljósufjöllum Hnappadal að Snæfellsjökli eftir Snæfellsnesfjallgarði. Gunnar Njálsson formaður ferðafélagsins segir gönguleiðina koma sem viðbót við þær gönguleiðir sem fyrir eru en Snæfellsnes sé sífellt að sækja í sig veðrið hvað varðar gönguferðir og útivist. “Við sóttum um styrk til Ferðamálastofu nú eftir áramót til undirbúnings. Nú fer af stað undirbúningsvinnan sem felst aðallega í hönnun og samningum við landeigendum. Það á enn eftir að stika leiðina en þetta verður margra ára verkefni.”

Aðalfundur UMFG verður haldinn á Kaffi 59 fimmtudaginn 3 mars 2011 kl. 20:00  Dagskrá: 1.           Fundur settur 2.           Fundarstjóri settur 3.           Skýrsla stjórnar 4.           Reikningar lagðir fram 5.           Kosning stjórnar 6.           Önnur mál UMFG leitar að nýjum gjaldkera og meðstjórnanda. Hafir þú áhuga eða villt frekari upplýsingar vinsamlegast hafið samband eða sendið umsókn til formanns, Tómas Freyr tomasfreyr@gmail.comfyrir 1. Mars 2011. Stjórn UMFG  

Þessa vikuna hafa staðið yfir þemadagar í grunnskólanum.  Krakkarnir á yngsta stigi hafa verið að vinna ýmis skemmtileg verkefni í sambandi við vatnið. Þau hafa meðal annars unnið ljóð og ýmsa orðavinnu, búið til listaverk úr plastpokum sem er til sýnis á girðingunni hjá skólanum, gert ýmsar tilraunir og búið til báta sem þau síðan prufukeyrðu í ánni í Gilósnum.  Hluti af verkefnunum eru  til sýnis í Samkaup Úrval.  Í dag fimmtudaginn 24.02 ætla krakkarnir síðan að flytja skemmtilegt lag um vatnið.  Flutningurinn fer fram  á þvottaplaninu hjá Samkaupum - Úrvali kl. 11.50Hlökkum til þess að sjá sem flesta.Hér má sjá auglýsinguna.

Sýning á verkum nemenda á mið– og unglingastigi frá þemadögum. Sýningin verður í Bjöllusalnum hjá Ragnari og Ásgeiri. Allir velkomnir að skoða :) Fimmtudaginn 24. febrúar. Opið frá 12:00—16.00   Nemendur og starfsfólk Grunnskóla Grundarfjarðar.   Auglýsing hér.  

Dögg Mósesdóttir hefur verið tilnefnd til menningarverðlauna DV: "fyrir hina ört vaxandi alþjóðlegu kvikmyndahátíð: Northern Wave Film Festival á Grundarfirði sem leggur áherslu á að sýna stutt- og tónlistarmyndir. Einnig fyrir það framtak að leiða saman bæði íslenska og erlenda tónlistar- og kvikmyndagerðarmenn og gefa litlum bæ á köldum dögum dagsljós og líf."   Við óskum Dögg innilega til hamingju með verðskuldaða tilnefningu.