Fréttir & tilkynningar

Guðrún Guðmundsdóttir augnlæknir verður með móttöku á HVE Grundarfirði fimmtudaginn 5. desember n.k. Tekið er á móti tímapöntunum á Heilsugæslustöð Grundarfjarðar, sími 432 1350.    

  Íbúaþing á laugardaginn   Næstkomandi laugardag, 23. nóvember, býður Grundarfjarðarbær til íbúaþings í Fjölbrautaskóla Snæfellinga, kl. 11 - 15.  Dagskrá þingsins samanstendur af fjölbreyttum erindum þar sem heimamenn og gestir koma við sögu.  Að þeim loknum verða umræður í litlum hópum og geta allir viðstaddir stungið upp á umræðuefni.    Dagurinn hefst á morgunverði kl. 10.30 og síðan verður þingið sett kl. 11.  Þá taka við erindi tengd Svæðisgarði Snæfellinga, þar sem Björg Ágústsdóttir verkefnisstjóri hjá Alta, segir frá stöðu verkefnisins og síðan talar Silja Rán Arnardóttir um ungt fólk og Snæfellsnes.  Hún situr í stjórn Snæfríðar, hópi ungs fólks á Snæfellsnesi sem tengist Svæðisgarðsverkefninu.  Gunnar Kristjánsson, verkefnisstjóri segir frá mótun skólastefnu Grundarfjarðar sem nú er unnið að og Jón Eggert Bragason, skólameistari FSN gerir tilraun til að svara spurningunni „Er hægt að mennta frumkvöðla?“.  Því næst fá þinggestir að heyra um sýn ungs fólks og eldra fólks á Grundarfjörð, frá Elsu Árnadóttur, formanni Félags eldri borgara og fulltrúum frá Félagsmiðstöðinni Eden.  Síðasti hluti erindanna er helgaður atvinnumálum.  Þar fjallar Arnljótur Bjarki Bergsson, sviðsstjóri hjá Matís um sóknarfæri í sjávarútvegi og Ásbjörn Björgvinsson, formaður Ferðamálasamtaka Íslands flytur erindi sem hann kallar „Samfélagsleg áhrif ferðaþjónustu, dæmisögur og tækifæri“.    Að erindum loknum verða umræður með afslöppuðu og þægilegu fyrirkomulagi.  Hver sem vill getur stungið upp á umræðuefni og þátttakendur velja sér síðan hópa.  Þegar hópar hafa skilað niðurstöðum, verður þinginu slitið kl. 15.  Þinginu stýra Sigurborg Kr. Hannesdóttir, forseti bæjarstjórnar og Ragnar Smári Guðmundsson.  Þau sitja í stýrihópi vegna þingsins, ásamt Þorbjörgu Gunnarsdóttur og með þeim hefur starfað Alda Hlín Karlsdóttir, menningar- og markaðsfulltrúi.      „Börn eru engin fyrirstaða“ eins og þar stendur, því boðið verður upp á barnagæslu í Leikskólanum Sólvöllum.  Veitingar á þinginu eru í boði Grundarfjarðarbæjar.  Hægt er að koma í stuttan tíma eða vera allan daginn, eftir því sem hentar.    Á þinginu er lögð áhersla á að heyra raddir ungs fólks í bland við raddir þeirra sem eldri eru og reyndari.  Það er von bæjarstjórnar og stýrihóps að Grundfirðingar gefi sér stund frá amstri dagsins til að horfa fram á veginn og líta til nýsköpunar og tækifæra.  Og að sjálfsögðu eru nágrannar á Snæfellsnesi velkomnir.        

Hver vill koma og hjálpa mér að velja bækur úr bókatíðindunum?   Hittumst kl. hálf sex á bókasafninu í Sögumiðstöð þessa og næstu viku.   Það má líka setja tillögur inn á Facebook bókasafnsins og á netfangið bokasafn(hjá)grundarfjordur.is.

Laugardaginn 23. nóvember verður haldið íbúaþing í Grundarfirði.  Þingið verður haldið í húsi FSN. Húsið opnar kl. 10.30, þá verður hægt að gæða sér á morgunverði. Þingið hefst svo kl. 11.00. Dagskrárlok eru kl. 15.00. Barnapössun verður í boði á leikskólanum. Nánari dagskrá verður auglýst síðar.  

Óskum eftir að ráða kennara til kennslu í raungreinum frá og með næstu áramótum. Meðal kennslugreina eru eðlisfræði, efnafræði og jarðfræði.   Laun greiðast samkvæmt stofnanasamningi skólans.    

Rauði kossinn í Grundarfirði heldur 4 klst, skyndihjálparnámskeið miðvikudaginn 20. nóvember kl.18:00-22:00. Haldið í húsnæði Sögumiðstöðvar.   Námskeiðið er ætlað öllum þeim sem vilja læra eða rifja upp grunnatriði skyndihjálpar og sálræns stuðnings og öðlast lágmarksfærni í að veita slösuðum eða veikum aðstoð í bráðatilfellum. Stutt og gott námskeið fyrir alla.   Markmið: Að þátttakendur öðlist grunnfærni í að beita skyndihjálp og sálrænum stuðningi í neyðartilvikum.     Leiðbeinandi á námskeiðinu verður Þórarinn Steingrímsson. Verð kr. 3.900,-  innifalið er skyndihjálpar skírteini.Nánari upplýsingar: á bryndistheo@gmail.com eða www.raudikrossinn.is  og í síma 862-1355  

Tónleikum Tónlistarskóla Grundarfjarðar sem vera áttu í samkomuhúsinu í kvöld er frestað um óákveðinn tíma vegna veðurs og slæms veðurútlits. Til stóð að flytja verðmætan tækjabúnað og hljóðfærakost skólans á milli húsa um og eftir hádegið til að stilla upp og gera klárt fyrir rennsli sem hefjast átti kl.16 í dag. Ekki þykir ráðlegt að taka slíka áhættu þar sem tækin, búnaðurinn og hljóðfærin eru mjög viðkvæm fyrir raka og bleytu. Okkur þykir þetta miður þar sem nemendur hafa lagt mikinn tíma í undirbúning vegna þessa en við munum halda tónleikana síðar og flytja þessa dagskrá við fyrsta tækifæri.   Skólastjóri  

Fræðslufundur undir yfirskriftinni Foreldrar og forvarnir sem fyrirhugaður var í kvöld kl. 18:00 í Framhaldsskóla Snæfellinga frestast vegna veðurs. Nýr fundartími er fyrirhugaður í byrjun desember og verður hann auglýstur nánar á næstu dögum.   Heimili og skóli, SAFT og Vímulaus æska – Foreldrahús biðjast velvirðingar á að fresta þessu í annað sinn en við höfum fulla trú á að þetta gangi í gegn í þriðju atrennu.   Hlökkum til að koma og vera með ykkur, vonandi í desember.   

Hittumst og kynnumst Paimpol   Í Sögumiðstöðinni 13. nóvember frá kl 16.00 – 18.00 munu gestir okkar frá Paimpol kynna bæinn sinn. Paimpol er nefnilega ekki bara franskt þorp sem tengdist okkur í gamla daga heldur er bærinn frábær sumaráfangastaður. Hér er kjörið tækifæri fyrir Grundfirðinga að kynna sér Paimpol, fólkið og möguleikana. Það verður heitt á könnunni og gott meðlæti.   Franskir sjómenn við Íslandsstrendur   Sýningin Franskir sjómenn við Íslandsstrendur verður opnuð í Markaðnum við Nesveg miðvikudaginn 13. nóvember kl 20.00.  Hjónin Halldór Björnsson og María Óskarsdóttir frá Patreksfirði hafa kynnt sér sögur af samskiptum franskra sjómanna við Íslendinga. Sögunum söfnuðu þau saman og gáfu út fallega bók. María heldur erindi um franska sjómenn með áherslu á sögur frá Grundarfirði. Allir velkomnir.  

Skráning er nú í fullum gangi í fiskiréttakeppnina sem haldin verður að þessu sinni í fiskvinnslu Soffanías Cecilssonar Hf.  Hrefna Rósa Sætran mun dæma í keppninni í ár en verðlaunin eru ekki af slakari endanum. Sigurvegarar í keppninni fá í verðlaun gjafabréf, út að borða fyrir tvo í smakkréttamatseðil á Fiskmarkaðinn. Hægt er að skipta smakkmatseðlinum út fyrir annað ef fleiri en tveir eru í vinningsliðinu. Þátttakendur geta skráð sig með því að hafa samband við Dögg Mósesdóttur í síma 7700577, á facebook eða með tölvupósti á info@northernwavefestival.com.   Í ár verður í fyrsta sinn rukkað um aðgangseyri sem hefur verið haldið í algjöru lágmarki, 2.500 kr fyrir armband með aðgang að allri hátíðinni. Við vonum að sem flestir vilji styðja hátíðina í verki með þessum hætti. Hægt verður að kaupa armböndin í kaffisölunni í Samkomuhúsinu. Allir Grundfirðingar eru velkomnir í Fiskiveisluna og á bíósýningar og þurfa ekki að kaupa armbönd til þess, frekar en þeir kjósa. Þeir sem taka þátt í Fiskiréttakeppninni og leikstjórar/fulltrúar mynda fá að sjálfsögðu armbönd, þeim að kostnaðarlausu.   Við hlökkum til að sjá ykkur sem flest á hátíðinni um næstu helgi.