Fréttir & tilkynningar

Nú er farið að halla að hausti og undirbúningur Rökkurdaga að hefjast. Hátíðin í ár stendur yfir frá 9. - 14. október. Bæjarbúar og félagasamtök eru hvött til að taka þátt og koma með tillögur.  Þeir sem eru með hugmyndir eru vinsamlegast beðnir um að hafa samband við Öldu Hlín, menningar- og markaðsfulltrúa í netfangið alda@grundarfjordur.is.  Frestur til að skila inn tillögum er til og með 28. september.  

Lestur og læsi er málefni Bókasafnsdagsins og á vel við á Alþjóðadegi læsis. Markmið bókasafnsdagsins er að venju að vekja athygli á öllu því mikilvæga starfi sem unnið er á öllum tegundum bókasafna og nauðsyn þeirra fyrir samfélagið. Fylgist með í fjölmiðlum. Skoðið veggspjald með uppáhaldssögupersónum bókasafnafólks. Kosningu vegna bókaverðlauna barnanna er lokið og síðustu forvöð að skila seðlum inn á bókasafnið í Sögumiðstöðinni í dag.  

Á síðasta ári ákvað íþrótta- og æskulýðsnefnd Grundarfjarðarbæjar að halda forvarnardag í Grundarfirði. Dagurinn 9. september varð fyrir valinu og verður forvarnardagurinn nú haldinn í annað skiptið. Dagskráin í ár er fjölbreytt en markmiðið er að ná til sem flestra.   Í ár verður dagskráin á þessa leið:   Vís gefur nemendur leik- og grunnskóla endurskinsmerki. Leikskólinn: Börnin í leikskólanum fá heimsókn frá slökkviliði   Grundarfjarðar. Grunnskólinn: Slökkvilið Grundarfjarðar mætir í skólastofur og fer yfir helstu brunavarnir. Fjölbrautaskóli Snæfellinga: Þorlákur Árnason, fyrrverandi þjálfari kvennaliðs Stjörnunnar í knattspyrnu, ræðir við nemendur um það hvernig eigi að finna hæfileikum sínum farveg og markmiðasetningu. Hann mun einnig ræða almennt um forvarnir. Bæringsstofa: Fræðslu og kynningarfundur  CoDA. CoDA er félagsskapur karla og kvenna sem tekst á við meðvirkni sem ákveðið rof í andlegri vitund einstaklings. Fundurinn hefst kl. 20:00. Heitt á könnunni.   Íþrótta- og æskulýðsnefnd Grundarfjarðarbæjar.  

Björg Karlsdóttir hefur verið ráðin sem leikskólastjóri Leikskólans Sólvalla og hóf störf í byrjun september. Björg hefur langa reynslu sem leikskólakennari og starfaði m.a. sem leikskólastjóri á Reykhólum og sem aðstoðarleikskólastjóri í Færeyjum. Björg hefur góða reynslu í uppbyggingu á starfi leikskóla.   Björg tekur við af Matthildi Guðmundsdóttur, sem hættir nú að eigin ósk sem leikskólastjóri. Matthildur hefur verið starfsmaður leikskólans frá upphafi, eða í tæp 38 ár og síðustu sex árin sem leikskólastjóri. Það er mikið lán fyrir Grundarfjarðarbæ að fá áfram að njóta starfskrafta hennar í 50% stöðugildi við leikskólann.   Um leið og Matthildi eru þökkuð góð störf er Björg Karlsdóttir boðin hjartanlega velkomin til starfa.  

Grundarfjarðarbær auglýsir starf aðalbókara laust til umsóknar. Aðalbókari hefur umsjón með bókhaldi Grundarfjarðarbæjar, stofnana og fyrirtækja sveitarfélagsins. Hann annast bókun fylgiskjala, afstemmingar og aðra úrvinnslu úr fjárhagsbókhaldi, sér um reikningagerð, skýrslugerð og greiningarvinnu úr bókhaldi auk þess að annast uppgjör og áætlanagerð í samvinnu við yfirmann og endurskoðendur.  

Fimmtudaginn 11. september kl. 20:00 – 21:30. Fundarstaðir: FSN Grundarfirði og Framhaldsdeild FSN á Patreksfirði. Starfsmenn Fjölbrautaskóla Snæfellinga  kynna starfsemi skólans.   Dagskrá:    

Svæðisskipulagsnefnd sveitarfélaganna á Snæfellsnesi auglýsir, skv. 24. gr. skipulagslaga nr. 123/2010, tillögu að svæðisskipulagi fyrir Snæfellsnes. Í tillögunni, sem samanstendur af greinargerð auk umhverfisskýrslu, er sett fram stefna um byggðar- og atvinnuþróun á Snæfellsnesi sem miðar að því að atvinnulífið, þekkingargeirinn og samfélagið nýti sér í auknum mæli þau verðmæti sem felast í náttúru- og menningarauði Snæfellsness og að skipulag og mótun byggðar og umhverfis taki mið af honum. Þannig styrki áætlunin staðaranda og ímynd Snæfellsness og efli atvinnulíf og byggð á svæðinu.  

Grundarfjarðarbær hefur síðustu ár verið með samning við innheimtufyrirtækið Motus vegna innheimtu fasteignagjalda. Með samningi þessum hefur náðst góður árangur, greiðsluhraði aukist og öryggi innheimtu orðið meiri. Ákveðið hefur verið að stíga enn frekari skref í innheimtu gjalda hjá Grundarfjarðarbæ. Frá 1. september mun innheimta annarra gjalda bæjarins einnig fara í gegnum Motus, séu þau ekki greidd innan eðlilegs greiðslufrests. Þetta er í samræmi við Innheimtureglur Grundarfjarðar.Gert er ráð fyrir að meirihluti greiðenda muni ekki finna fyrir þessari breytingu. Markmið Grundarfjarðarbæjar er að auka öryggi innheimtu og greiðsluhraða með þessari breytingu, auk þess að gæta jafnræðis meðal íbúa.   Vonast er til að breytt fyrirkomulag verði til hagsbóta fyrir alla og að viðskiptavinir verði ekki fyrir óþægindum vegna breytinganna. Vakni upp spurningar vegna þessa er viðskiptavinum bent á að hafa samband við bæjarskrifstofu.  

Miðvikudaginn 3. september ætlar fulltrúi Evrópu og unga fólksins að koma til okkar á Snæfellsnesið og vera með kynningu á starfsemi skrifstofunnar.Evrópa unga fólksins er rekin af Ungmennafélagi Íslands (UMFÍ) í samstarfi við Mennta- og menningarmálaráðuneytið og Framkvæmdastjórn Evrópusambandsins. Hlutverk skrifstofunnar er að veita styrki til æskulýðsgeirans á Íslandi úr Erasmus+ sem er mennta- æskulýðs- og íþróttaáætlun ESB.Þetta er kjörin kynning fyrir alla þá sem er að vinna með ungu fólki. Hér eru mög skemmtileg tækifæri sem okkur gætu mögulega boðist. Fyrirlesturinn verður í Bæringsstofu kl. 16:00 næstkomandi miðvikudag, 3. september. Látum þetta gjarnan berast til allra þeirra sem gætu haft gagn og gaman af.

Háskólalest Háskóla Íslands leggur brátt af stað á Snæfellsnes með fjölbreytta dagskrá fyrir alla aldurshópa. Lestin á tuttugu ferðir að baki og hefur farið víða um land við miklar vinsældir. Í ferðum Háskólalestarinnar er lögð er áhersla á lifandi og litríka dagskrá fyrir alla fjölskylduna og eru allir viðburðir ókeypis. Lestin verður á Snæfellsnesi dagana 29. og 30. ágúst, í Ólafsvík og Grundarfirði.