Fréttir & tilkynningar

Tónlistarskóli Grundarfjarðar hélt sína árlegu jólatónleika í sal Fjölbrautarskóla Snæfellinga mánudaginn 14. desember síðastliðinn. Þar spiluðu nemendur jólalög fyrir Grundfirðinga á meðan þeir sýndu hvað þeir höfðu lært um veturinn.  

Nemendur í 7. - 10. bekk Grunnskóla Grundarfjarðar unnu sameiginlega að skemmtilegu þemaverkefni síðustu daga fyrir jólafrí þar sem nemendur sköpuðu stærðarinnar jólaþorp. Segja má að nemendur hafi hugsað fyrir hverju smáatriði. Leir var notaður til að búa til persónur og dýr og pappi, málning og alls kyns smáhlutir notaðir til að byggja upp heimili og fyrirtæki og nánast alla þá þjónustu sem bæjarfélög vilja í sinni heimabyggð. Sköpuðu nemendur til að mynda sundlaug með heitum pottum, sérstaka sælgætisverslun, hesthús, dvalarheimili, skóla, bakarí, kirkju, bæjarráðshús, eyju með skautasvelli og fleiri einingar. Þá voru tendruð ljós um allt þorpið, götuljós og jólaljós í húsum. Verkefnið tókst vel til í alla staði og voru nemendur ánægðir með vinnu sína og sköpun. Með þessu verkefni tókst að samþætta námsþætti, sköpunargleði og samvinnu.    

Útskriftarhátíð Fjölbrautaskóla Snæfellinga verður haldin föstudaginn 18. desember í hátíðarsal skólans í Grundarfirði. Hátíðin hefst kl.15:00 og að henni lokinni verða kaffiveitingar í boði skólans.   Allir velunnarar skólans eru velkomnir. Skólameistari  

     

  Bæjarstjórn Grundarfjarðarbæjar hefur samþykkt á fundi  5. nóvember 2015 að endurauglýsa breytingu á deiliskipulagi  samkvæmt  43. gr. skipulagslaga nr. 123/2010. Deiliskipulagsbreytingin felst í sameiningu lóða 4b og 6 á Nesvegi í lóð 6. Lóðarmörk lóðar 4 breytist jafnframt á móti lóð 6. Nýtingarhlutfallið breytist úr 0.90 í 0.95. Mesta leyfilega hæð mannvirkis verður 16m. Sjá nánari upplýsingar í deiliskipulagstillögu.  

Jólamarkaður Lions verður í Sögumiðstöðinni dagana 10 – 12. desember.   Fimmtudaginn 10.  og föstudaginn 11.  verður opið frá 16.00 til klukkan 19.00  Laugardaginn 12 desember verður opið frá kl. 14.00 til klukkan 16.00.     Meðal þess sem verður á boðstólum á jólamarkaði Lions má nefna lifandi jólatré og greinar, leiðisskreytingar, fiskmeti af ýmsu tagi ásamt ýmsu öðru góðgæti. Þá verður til sölu rjúkandi heitt súkkulaði og rjómavöfflur.  Jólasveinninn verður einnig á kreiki þessa daga.  Allur ágóði af sölunni rennur í líknar- og menningarsjóð Lionsklúbbs Grundarfjarðar.   Lionsklúbbur Grundarfjarðar.  

191. fundur bæjarstjórnar Grundarfjarðar verður haldinn í Ráðhúsi Grundarfjarðar fimmtudaginn 10. desember 2015, kl. 16:30.  

Íþróttahúsið mun loka kl.15.00. í dag vegna veðurs. Allar íþróttir falla því niður í dag.    

    Startup Tourism er nýr viðskiptahraðall (e. Business accelerator) á vegum Klak Innovit sem miðar að því að bæta faglega undirstöðu hjá nýjum fyrirtækjum í ferðaþjónustu auk þess að stuðla að dreifingu ferðamanna um landið allt árið um kring. Vinnusmiðja í Startup Tourism verður haldin í Hugheimum, Bjarnarbraut 8 í Borgarnesi þann 10. desember næstkomandi og stendur frá kl. 10:00 til 18:00.  

    Frestur til að skrá sig í Landnemaskóla 2 hefur verið framlengdur til 15. desember.  Skólinn er ætlaður íbúum Snæfellsness af erlendum uppruna sem vilja bæta við sig íslenskukunnáttu en æskilegt er að þátttakendur hafi grunnþekkingu á íslenskri tungu.   Athugið að hægt er að sækja um styrk fyrir námskeiðsgjaldinu til verkalýðsfélaganna.