Fréttir & tilkynningar

UT-2006, ráðstefna um upplýsingatækni í skólastarfi, hófst í morgun kl. 11:00 í Fjölbrautaskóla Snæfellinga í Grundarfirði. Um 300 þátttakendur voru skráðir á ráðstefnuna, en með starfsmönnum ráðstefnunnar og FSN og sýnendum er áætlað að um 400 manns séu í húsinu. Nokkur fyrirtæki eru með kynningarbása í anddyri skólans og á bókasafni þar sem þau kynna vörur sínar. Brynhildur Ólafsdóttir fréttamaður og Sölvi Sveinsson skólastjóri Verzlunarskóla Íslands stýra umræðum á ráðstefnunni.   Brynhildur Ólafsdóttir stýrði umræðum.

Menningarráð Vesturlands hefur auglýst styrki til úthlutunar úr menningarsjóði. Fulltrúi menningarráðs verður með viðtalstíma á bæjarskrifstofu Grundarfjarðar þriðjudaginn 14. mars kl. 17:00-19:00. Umsóknareyðublöð og úthlutunarreglur má nálgast á vef SSV en einnig er hægt að nálgast gögnin útprentuð á bæjarskrifstofunni. 

Menntamálaráðuneytið stendur fyrir UT2006 - ráðstefnu um þróun í skólastarfi, föstudaginn 3. mars 2006. Ráðstefnan er haldin í Fjölbrautaskóla Snæfellinga í Grundarfirði. Á UT2006 er áhersla lögð á sveigjanlega kennsluhætti. Ráðstefnugestir verða virkir þátttakendur í dagskránni og formlegir fyrirlestrar verða í lágmarki.  

Búnaðarsamtök Vesturlands og Héraðssamband Snæfellsness- og Hnappadalssýslu standa sameiginlega að félagsmálanámskeiði sem verður að Lýsuhóli 7. og 8. mars klukkan 20. Skráning er á skrifstofu HSH hsh@hsh.is eða síma 436 1635 fyrir 6. mars. Sjá nánar hér. 

Green Globe samtökin halda áfram að vera í þróun eins og öll önnur fyrirtæki/samtök. Þau hafa nú gert endurbætur og breytingar bæði á viðmiðum og stöðlum til úttektar. Eins hafa þau breytt nafni samtakanna sem heita nú bara GREEN GLOBE. Talan 21 er fallin aftan af. Ný vefslóð samtakanna er www.greenglobe.org. Nýtt lógó hefur verið hannað til að fylgja þessum breytingum og verður það væntanlega það sem sveitarfélögin á Snæfellsnesi fá bæði eftir að viðmiðum (Benchmarking) verður mætt næst og eins eftir vottunina.  

Yngri kynslóðin í Grundarfirði tók þátt í Orkuátaki Latabæjar sem stóð yfir í febrúar 2006 og náðu Grundfirðingar flestum stigum þeirra sveitarfélaga sem tóku þátt. Alls fengu Grundfirðingar 123.142 stig. Latibær færði Grundfirðingum sérstakar hamingjuóskir í auglýsingu í Mbl. í dag, 1. mars. Íþróttaálfurinn og Solla stirða hafa svo sannarlega mikil áhrif á börnin og eru góðar fyrirmyndir. Solla stirða var vinsæl á Öskudegi í Leikskólanum Sólvöllum.   Elísabet Páley, Björg, Sunna, Karen Lind, Alma Jenný og Viktoría Ása voru allar Solla stirða í tilefni Öskudagsins  

Perlan að dæla efni í höfninaD/S Perla frá Björgun ehf. kom til Grundarfjarðar í morgun. Perla er aðallega notuð til dýpkana, landfyllingar og annarra skyldra verkefna. Skipið ber 300 m³ af efni og getur dælt efni upp af 20 m dýpi. Skipið er 50 m að lengd og verður hér í um það bil hálfan mánuð við vinnu við undirlag vegna landfyllingar við Stóru-bryggju. Um 10 þúsund m³ af efni af hafsbotni fara í verkið. Eftir að Perlan hefur lokið við verkið tekur Berglín ehf. í Stykkishólmi við og lýkur við landfyllinguna. Verklok eru 1. júní nk.

Hagstofa Íslands birtir árlega tölur um íbúa eftir fæðingarlandi og ríkisfangi. Hafa ber í huga að þessar tölur gefa ekki raunsanna mynd af fjölda innflytjenda hér á landi. Allmargir innflytjendur fá með tíð og tíma íslenskt ríkisfang og meðal þeirra einstaklinga sem fæddir eru í útlöndum er talsverður fjöldi barna íslenskra foreldra sem bjuggu tímabundið erlendis.  Sjá nánar á vef Hagstofu Íslands.

Undanfarinn mánuð hafa fimm vinnuhópar starfað og undirbúið tillögur til stýrihóps fjölskyldustefnu. Á fundi í samkomuhúsinu 23. febrúar sl. með stýrihópi, bæjarstjórn, nefndum og fleirum, skiluðu hóparnir vinnu sinni og gerðu hópstjórarnir grein fyrir niðurstöðum. Vinna hópanna fer nú til úrvinnslu í stýrihópi, sem mun skila bæjarstjórn vinnu sinni. Áætlað er að vinnu við mótun fjölskyldustefnu ljúki í mars.   Sr. Elínborg Sturludóttir flutti erindi um gildi í samfélaginu.                                              

Aðalfundur Ferðamálasamtaka Snæfellsness verður haldinn á Hótel Ólafsvík sunnudaginn 5. mars 2006 kl. 16.00 Dagskrá: Venjuleg aðalfundarstörf – Útgáfumál – Green Globe 21 – Þjóðgarðurinn Snæfellsjökull Ferðaþjónustuaðilar, sveitarstjórnarmenn og aðrir sem vilja taka þátt í umræðu um ferðamál á Snæfellsnesi eru hvattir til að mæta.