Fréttir & tilkynningar

Seinni hópur vinnuskólans tekur til starfa mánudaginn 30. júní 2008. Þeir unglingar sem sótt hafa um eru beðnir að mæta á mánudagsmorguninn kl. 8.30 í áhaldahúsinu. Þeir sem vilja skrá sig í vinnu í þennan hóp eru beðnir að koma á bæjarskrifstofuna og fylla út umsóknareyðublöð.

Fimmtudagskvöldið 26. júní nk. kl. 19 verður fyrsta fjöruferðin af fjórum í sumar á vegum þjóðgarðsins Snæfellsjökuls og sjávarrannsóknarsetursins Varar. Farið verður í fjöruna við Gufuskálavör með mánaðar millibili og fegurð hennar og fjölbreytileiki kannaður og fylgst með breytingum á lífríkinu með ýmsum athugunum. Mismunandi áherslur verða í hverri ferð og mun Erla Björk Örnólfsdóttir sjávarlíffræðingur leiða ferðirnar. Hver ferð stendur í um 1-2 klst. og er fólki bent á að mæta í stígvélum og klæða sig eftir veðri. Ekki er nauðsynlegt að mæta í allar ferðirnar en örugglega skemmtilegast! Laugardaginn 28. júní hefst svo vikuleg dagskrá þjóðgarðsins sem stendur til 14. ágúst. Þá verður barnarstund við tjaldsvæðið á Anrarstapa á laugardögum frá 11-12, gönguferð frá Arnarstapa að Hellnum á laugardögum, ganga frá Búðum að Frambúðum á sunnudögum, á þriðjudögum ganga frá Svalþúfu að Lóndröngum og leiðin Djúpalónssandur-Dritvík verður gengin á fimmtudögum. Allar göngurnar byrja kl. 14 og stand í um 1-2 klst. Landverðir þjóðgarðsins sjá um leiðsögn og er frítt í allar göngur og barnastund eins og í aðra viðburði á vegum þjóðgarðsins. Sumardagskrá þjóðgarðsins í heild sinni má finna á vef þjóðgarðsins á síðunni www.ust.is .   Nánari upplýsingar veitir Guðrún Lára Pálmadóttir, sérfræðingur S: 436 6860/822 4009  

                                    Gestir skemmtiferðaskipsins MS Albatros voru boðnir velkomnir til Grundarfjarðar af nýstárlegri móttökunefnd Grundarfjarðarhafnar. Móttökunefndin er í raun fjöllistahópur undir stjórn Sigurborgar Kr. Hannesdóttur. Hópinn skipa Guðmundur Haraldsson, Heiðdís Björk Jónsdóttir, Helga Ingvarsdóttir, Ingólfur Örn Kristjánsson, Marínó Ingi Eyþórsson og Sigurborg Knarran Ólafsdóttir. Gestirnir voru mjög ánægðir með sýninguna sem innihélt dans, söng, leiðsöguferðir og önnur atriði. Hópurinn mun starfa í sumar þegar hingað koma skemmtiferðaskip.   Hér eru fleiri myndir.  

Í morgun kom annað skemmtiferðaskip sumarsins til Grundarfjarðar. Var það MS Albatros sem er 205 metrar að lengd og 28.518 brúttótonn. Um borð voru 940 farþegar. Þessa stundina eru á milli 6 og 7 hundruð þeirra á ferð með rútum umhverfis Snæfellsjökul en hluti hópsins röltir um Grundarfjörð í einstakri veðurblíðu. Skipið fer frá Grundarfirði síðdegis í dag.   Frétt á heimasíðu Skessuhorns 20. júní 2008.

Áð í sandvík   Hópur kvenna er nú á reiðnámskeiði að Bergi og njóta vel leiðsagnar bændanna þar auk þess að sjá Grundarfjörð með nýjum augum. Mynd: RKP

Lúðrasveit Tónlistarskóla Grundarfjarðar lék nokkur lög við góðar undirtektir.   Þjóðhátíðardagur íslendinga, 17. júní, var haldinn hátíðlegur í Grundarfirði líkt og hefð er fyrir.  Hin venjubundna skrúðganga var gengin um Grundargötu og Borgarbraut inn í Þríhyrning þar sem boðið var upp á ýmis skemmtiatriði fyrir börnin ásamt ávarpi fjallkonu og hátíðarræðu sem bæjarstjórinn flutti að þessu sinni. Einnig voru nokkur ferðaþjónustufyrirtæki í Grundarfirði með kynningar á sinni starfsemi yfir daginn.  Hér má sjá myndir frá hátíðarhöldunum.

MS Albatros kemur til Grundarfjarðar föstudaginn 20. Júní. Skipið er 205 metrar á lengd, 28.518 tonn og tekur 940 farþega. Fyrstu siglinguna fór Albatros árið 1957 og geta má að þetta er í fyrsta skiptið sem viðkoma er höfð í Grundarfirði, en það mun gerast tvisvar núna í sumar. Skipið kemur frá Kiel í Þýskalandi og þegar haldið er héðan er förinni heitið til Jan Mayen og Noregs. Fyrirtækið Phoenix Reisen er með skipið á sínum snærum og mun annað skip á þeirra vegum, Alexander Von Humbolt, heimsækja okkur í Ágúst. Skipið kemur í höfn klukkan 8:00 og fer klukkan 17:00.

Hér má sjá landaðan afla í maí 2008 í Grundarfirði og samanburðartölur síðustu ára.

            Fjölbrautaskóli Snæfellinga óskar að ráða stuðningsfulltrúa í þrjár 100% stöður skólaárið 2008-2009. Störfin felast í stuðningi og aðstoð við nemendur á starfsbraut. Leitað er að starfsmönnum sem hafa góða samskiptahæfileika og hafa áhuga á að vinna með ungu fólki. Æskilegt er að umsækjendur hafi lokið stúdentsprófi. Laun greiðast eftir kjarasamningi fjármálaráðherra og viðkomandi stéttarfélags. Ráðið verður í stöðurnar frá 15. ágúst 2008.  

  Þátttakendur í Grundarhlaupinu Grundar og Kvernár hlaupin hafa verið árvissir viðburðir á 17 júní í fjölda ára og hafa margir Grundfirðingar spreytt sig á þeim.  Kvernárhlaupið er fyrir 11 ára og yngri og gaman að sjá yngstu krakkana spreyta sig.  Grundarhlaupið er fyrir 12 ára og eldri og er c.a. 2,5-2,8 km.