Fréttir & tilkynningar

Meistaraflokkur karla í knattspyrnu stendur fyrir Pub Quiz spurningaleik á Kaffi 59 þriðjudagskvöldið 6. október kl 21:00. Þetta er í þriðja skiptið sem keppt er í þessum spurningaleik. Síðast voru spurningarnar almenns eðlis og þá sigruðu Hilmar enskukennari, Addi þjálfari, Vignir stranda og Aðalgeir naumlega. Í þetta skiptið verða spurningarnar úr tónlistarheiminum. Nú er tími til að láta ljós sitt skína. Það var magnað stuð á síðasta pub quizi... hvernig verður það í kvöld?   Við í meistaraflokknum hvetjum sem flesta til að koma og taka þátt því þetta kostar bara 500 kr á mann og rennur allur ágóði í starf Meistaraflokks Grundarfjarðar.   Meistaraflokksráð.   

Margrét Björg Björnsdóttir, atvinnuráðgjafi. Fastir viðtalstíma í Grundarfirði og Stykkishólmi veturinn 2009 - 2010

Frétt á vef Skessuhorns 4. október 2009: Í gær hófst samæfing björgunarsveita á sjó við Grundarfjörð og í Kolgrafarfirði. Aðstæður til æfinga voru töluvert erfiðar og reyndi mjög á mannskap en það gerði verkefnið enn meira krefjandi. Á æfinguna voru mættir 17 hópar frá björgunarsveitum frá Akranesi, Reykjavík, Kópavogi, Hafnarfirði, Árborg, Suðurnesjunum, Stykkishólmi, Grundarfirði og Snæfellsbæ en æfinginn var skipulögð af björgunarsveitunum á Snæfellsnesi. Hún er liður í landsæfingu Landsbjargar og verður önnur æfing haldin helgina 24. október sem snýr að björgun á landi. Björgunaræfinginn fólst í því að leyst voru 27 verkefni af ýmsum toga. Má þar nefna mann sem slasaðist á skotæfingasvæðinu inni í Kolgrafarfirði en það var mjög krefjandi verkefni þar sem þurfti að fara undir brú á slöngubátnum þar í miklum straumi. Breiðleitaræfing var á Grundarfirði sem unnin var með stjórnstöð Landhelgisgæslunnar í Skógarhlíð.  

Forvarnardagur 2009 er haldinn í öllum grunnskólum landsins í dag, miðvikudaginn 30. september. Dagurinn er helgaður nokkrum heillaráðum sem geta forðað börnum og unglingum frá fíkniefnum, ráðum sem eiga erindi við allar fjölskyldur í landinu. Forvarnardagurinn er haldin að frumkvæði forseta Íslands í samvinnu við Samband íslenskra sveitarfélaga, Íþrótta- og Ólympíusamband Íslands, Ungmennafélag Íslands, Bandalag íslenskra skáta, Reykjavíkurborg, Háskóla Íslands og Háskólann í Reykjavík. Munu 9. bekkingar vinna ýmis verkefni í tengslum við forvarnir. Nánari upplýsingar má finna á vefsíðu verkefnisins.  

Hafin er vinna við gerð fjárhagsáætlunar Grundarfjarðarbæjar  fyrir árið 2010. Auglýst er eftir erindum, umsóknum, tillögum og ábendingum íbúa, félagasamtaka og fyrirtækja um mál sem varða gerð fjárhagsáætlunar. Þeir aðilar sem vilja koma með erindi, umsóknir, tillögur og/eða ábendingar er varða næsta fjárhagsár Grundarfjarðarbæjar eru hvattir til að skila þeim á bæjarskrifstofuna til skrifstofustjóra fyrir 16. október 2009. skrifstofustjóri  

Nú er vertíð skemmtiferðaskipa lokið og heimsóknir í sumar voru 13 talsins. Þessi skip voru að samanlagðri stærð 300 þúsund tonn, báru með sér 7200 farþega auk 4000 áhafnarmeðlima. Til samanburðar var samanlögð stærð skipanna árið 2008 221 þúsund tonn, farþegar 6200 og 3000 í áhöfnum. Annað árið í röð tók sérlegur móttökuhópur á vegum hafnarinnar á móti gestum. Hópinn skipuðu nokkrir vaskir Grundfirðingar af yngri kynslóðinni sem skipulögðu skemmtidagskrá samsetta úr víkingaleikjum, matseld, söng og dönsum. Markaðsfulltrúi hafnarinnar, Shelagh Smith, er nýkominn af ferðakaupstefnu í Hamborg, Seatrade Europe, þar sem áfram var unnið að markaðssetningu Grundarfjarðarhafnar. Nú þegar hafa 10 skip verið bókuð fyrir næsta sumar. Að meðaltali eru skipin stærri en undanfarin ár. Stærsta skipið, Ocean Princess, er 77 þúsund tonn. Annars gengur lífið á höfninni sinn vanagang. Afli er þokkalegur. Framkvæmdir við höfnina ganga vel. Vinnu við öldudempandi flái var lokið í síðustu viku og einnig uppsteypu á landstólpa fyrir landgang. Undirbúningur stendur yfir fyrir sjósetningu nýrrar flotbryggju.

  Blóðbankabíllinn verður í Grundarfirði við Samkaup þriðjudaginn 29. september kl. 12.00 - 17.00. Allir velkomnir.   Blóðgjöf er lífgjöf.

Fyrirlestur fjallar um: Áhrifamátt kvenna til að gera róttækar breytingar á heiminum sem við búum í  - nú í augnablikinu ÍSLANDI    

Frétt á vef Skessuhorns 24. september 2009: Reiknað er með að Breiðafjarðarferjan Baldur komi aftur til heimahafnar í Stykkishólmi í lok vikunnar en skipið hefur sem kunnugt er verið í afleysingum fyrir Herjólf í siglingum milli lands og Vestmannaeyja. Siglingar Baldurs milli Stykkishólms og Brjánslækjar, með viðkomu í Flatey, hefjast því aftur samkvæmt áætlun á sunnudaginn, þann 27. september.  Á þessum tíma frá 13. september síðastliðnum var samgöngum til Flateyjar þjónað fjórum sinnum í viku með Særúnu, farþegabát Sæferða. Þá hefur verið siglt tvisvar í viku til Brjánslækjar. Særún tekur yfir 100 farþega en getur ekki annast bíla- eða þungaflutninga. Særún er hins vegar snögg í ferðum og er til dæmis einungis um eina klukkustund á milli Stykkishólms og Flateyjar. 

Meistaraflokkur karla í knattspyrnu stendur fyrir Pub Quiz spurningaleik á Kaffi 59 þriðjudagskvöldið 22. september kl 21:00. Þetta er í annað skiptið sem keppt er í þessum spurningaleik. Síðast voru spurningarnar íþróttatengdar og þá sigraði Team T-bone naumlega. Í þetta skiptið verða spurningarnar almenns eðlis úr daglegu lífi. Við í meistaraflokknum hvetjum sem flesta til að koma og taka þátt því þetta kostar bara 500 kr á mann og rennur allur ágóði í starf Meistaraflokks Grundarfjarðar.   Meistaraflokksráð.