Fréttir & tilkynningar

Ljósin á sparkvellinum upp í grunnskóla eru biluð og verða það eitthvað áfram, unnið er að lagfæringu.

Opnunarviðburður Rökkurdaga 2010 eru glæsilegir tónleikar í samkomuhúsinu, miðvikudagskvöldið 3. nóvember kl. 20. Tónleikarnir eru á vegum Tónlistarskóla Grundarfjarðar og Leikklúbbur Grundarfjarðar aðstoðar við að veita gestum ánægjulega kvöldstund.

Samkvæmt 18. og 25. gr. skipulags- og byggingarlaga nr. 73/1997 með síðari breytingum er hér með auglýst eftir athugasemdum við breytingu á aðalskipulagi og við tillögur að deiliskipulagi af fjórum svæðum í Grundarfjarðarbæ.Tillögurnar voru samþykktar á 120. fundi umhverfisnefndar þann 5. október 2010 og samþykkti bæjarstjórn Grundarfjarðarbæjar þann 7. október 2010 að auglýsa eftir athugasemdum við tillögurnar sem bera heitið:

Fyrir 1. desember þurfa allir að vera með lögheimili sitt skráð á þeim stað sem þeir hafa fasta búsetu.  Þetta er mikilvægt svo öll réttindi sem fylgja lögheimili séu tryggð.  Skorað er á þá sem eiga eftir að tilkynna um flutning og nýtt lögheimili að ljúka því sem allra fyrst og í síðasta lagi fyrir næstu mánaðamót.  

Kosning til stjórnlagaþings verður laugardaginn 27. nóvember 2010. Á kjörskrá eru allir sem eru með lögheimili í sveitarfélaginu þremur vikum fyrir kjördag, þ.e. laugardaginn 6. nóvember 2010 uppfylli þeir aö öðru leyti skilyrði 1. gr. laga um kosningar til Alþingis nr. 24/2000.

Fjöldi íslenskra kvenna hefur tekið sig saman um að prjóna fyrir íslensk börn. Hlutirnir verða afhendir í byrjun desember til Mæðrastyrksnefndar og Fjölskylduhjálparinnar. Allt kemur til greina,sokkar, vettlingar, ennisbönd, treflar og húfur, þvíallt mun koma sér vel.

Starfsfólk bæjarskrifstofu Álftaness komu við á bæjarskrifstofu Grundarfjarðar þann 22. október á leið sinni í heimsókn til vinarbæjar þeirra Snæfellsbæjar. Þau skoðuðu Fjölbrautaskóla Snæfellinga í fylgd með Jóni Eggerti skólameistara, svo lá leiðin á Kaffi 59 þar sem  léttur hádegisverður var í boði áður en þau héldu áfram leið sinni til Snæfellsbæjar.   

    Eins og víða á landinu tóku konur í Grundarfirði sig saman og lögðu niður vinnu kl. 14.25 í gær, á kvennafrídaginn. Margar þeirra komu saman á Kaffi 59  og áttu notalega stund saman.  Kaffi 59 bauð upp á kaffi og nýbakaðar kleinur. Björg Ágústsdóttir rifjaði upp tilkomu kvennafrídagsins og síðan var gerð heiðarleg tilraun til að syngja lagið „Áfram stelpur“. Að endingu flutti Elna Bárðarson hjónabandsvísur eftir Árna heitinn Helgason frá Stykkishólmi. Gerði hún það með tilþrifum og uppskar mikið lófatak fyrir. Þess má geta að Elna er 88 ára gömul og býr á Dvalarheimilinu Fellaskjóli. Að samverustundinni lokinni héldu konurnar út í nýfallinn snjóinn, en þessum fyrsta snjó vetrarins hafði kyngt niður í stafalogni meðan á samverustundinni stóð. Myndir

Þann 24. október 1975 voru íslenskar konur hvattar til þess að taka sér frí einn dag. Það var til þess að minna á mikilvægi atvinnuframlags kvenna, innan heimilis og utan. Þessi dagur markaði tímamót í sögu jafnréttis á Íslandi. Þó margt hafi áunnist á 35 árum er enn verk að vinna: óútskýrður launamunur er enn til staðar og í ár er kastljósinu sérstaklega beint að þeirri staðreynd að ofbeldi gagnvart konum og börnum er allt of algengt.   Konur í Grundarfirði! Sýnum samstöðu með stallsystrum okkar vítt og breitt um landið og TÖKUM OKKUR FRÍ í dag – hittumst kl. 14.25 í KAFFI 59 og eigum góða stund saman. Kaffiveitingar gegn vægu gjaldi.   Konurnar í leikskólanum óska eftir samvinnu við foreldra og biðja þá foreldra sem það geta, að sækja börn sín fyrir kl. 14.25 í dag.   Áfram stelpur!     

Sunnudaginn 17. október var haldin uppskeruhátíð ferðaþjónustuðila í Grundarfirði. Dagurinn hófst á siglingu og sjóstangveiði í hressilegu veðri. Afli var rýr en ánægjan í hámarki. Er í land var komið hélt hópurinn til fundar í Sögumiðstöðinni. Farið var yfir ferðamannavertíðina og ferðaþjónustuaðilar kynntu sig og kynntust öðrum. Margar skemmtilegar hugmyndir voru reifaðar og greinilegt að það er hugur í ferðaþjónustuaðilum á svæðinu. Lokapunktur á góðum degi var svo hátíðarkvöldverður á Hótel Framnesi. Þar gæddi hópurinn sér á ljúffengum kræsingum og móttökuhópur hafnarinnar tók lagið.