Fréttir & tilkynningar

Kennsla hefst skv. stundaskrám mánudaginn 1.september. Nýr kennari hefur bæst í hópinn en það er Tryggvi Hermannsson sem einnig hefur verið ráðinn organisti hér við Setbergsprestakall. Tryggvi mun sjá um forskólann, ásamt tónfræði-og píanókennslu, en sérstök áhersla verður lögð á eflingu söngstarfs m.a. í samstarfi við grunnskólann.  

Ársfundur Vestnorræna ráðsins verður haldinn í Grundarfirði og hefst í dag, 25. ágúst og stendur fram á miðvikudag. Alls verða gestir um 40 frá Færeyjum, Grænlandi og Íslandi. Karl V. Matthíasson hefur gengt formennsku í ráðinu síðastliðið ár og er hann einnig formaður Íslandsdeildar Vestnorræna ráðsins. Jafnframt verður haldinn þemadagur um sameiginlega sögu og menningu Vestur-Norðurlanda í Sögumiðstöðinni.

Á sunnudagsmorgun keppir íslenska landsliðið í handbolta um ólympíugullið. Áhugasamir Grundfirðingar ætla að koma saman á Kaffi 59 og fylgjast með leiknum. Húsið opnar klukkan 7:30 og leikur hefst 15 mínútum síðar. Þeir sem vakna of seint til að fá sér morgunverð geta pantað sér egg og beikon á staðnum. Þess má geta að í vinabæ okkar í Paimpol eru menn líklega álíka spenntir. Það má búast við því að þessi leikur eigi eftir að styrkja vináttuböndin enn frekar hver svo sem úrslitin verða.   Áfram Ísland!  

Seglskútan Notre Dame des Flots liggur nú við bryggju. Skútan er smíðuð um 1940 og 8 manna áhöfn hennar skipa tvær fjölskyldur. Hún lagði af stað frá Frakklandi, Miðjarðarhafsmegin, 17. September 2007 og sigldi niður með Spánarströnd. Fór svo yfir Atlandshafið til Mexíkó. Þá tók við tími í karabíska hafinu og þau stoppuðu á Kúbu um tíma. Þvínæst var siglt í norður, upp austurströnd Norður-Ameríku til Kanada. Þaðan var haldið til Íslands, svo Færeyja, Íslands og Orkneyja. Þá var snúið við, komið við í Færeyjum og nú eru þau hér í Grundarfirði. Skipstjórinn segir að ekki sé enn ákveðið hvert skuli halda næst. Fyrir þá sem vilja fræðast frekar um þessa glæsilegu skútu eru upplýsingar og myndir hér.  

Tvö síðustu skemmtiferðaskip sumarsins heimsækja Grundarfjörð um helgina. Það eru skipin MV Funchal í sinni annarri heimsókn og svo MV Alexander Von Humboldt sem er að koma til okkar í fyrsta skipti.   Funchal er löngu orðið vel þekkt í Grundarfirði og hér finnast frekari upplýsinga um skipið. Þess má geta að því miður fellur hefðbundinn knattspyrnuleikur niður vegna veðurs.   Von Humboldt er 15.343 tonn og 152,5 metrar á lengd. Hann tekur 475 farþega.  Skipið er á vegum Phoenix Reisen og er skráð á Bahama eyjum. Það var tekið í notkun undir þessu nafni í maí 2008 en hefur áður siglt undir nöfnunum Crown Monarch og Jules Verne. Flestir farþegarnir í þessari ferð eru þýskir.    

Mánudaginn 25. ágúst hefst haustopnunartími sundlaugarinnar. Þá verður opið frá 7-8 og frá 16-21 á virkum dögum. Um helgar verður opið frá 10-16.   Starfsfólk.

Valnefnd í Setbergsprestakalli, Snæfellsness- og Dalaprófastsdæmi, ákvað á fundi sínum þann 18. ágúst síðastliðinn að leggja til að Aðalsteinn Þorvaldsson, cand. theol., verði ráðinn sóknarprestur í Setbergsprestakalli. Sex umsækjendur voru um embættið.   Embættið veitist frá 1. september næstkomandi. Biskup Íslands skipar í embættið til fimm ára að fenginni umsögn valnefndar. Valnefnd skipuðu níu manns úr prestakallinu ásamt prófasti Snæfellsness- og Dalaprófsstsdæmis.   Aðalsteinn Þorvaldsson lauk guðfræðiprófi frá HÍ 2001. Hann hefur starfað mikið innan skátahreyfingarinnar og gegnt stöðu félagsmálastjóra Bandalags íslenskra skáta frá 2006.    Frétt af kirkjan.is

Sjávarútvegs- og landbúnaðarráðuneytið hefur ákveðið að umsóknarfrestur um úthlutun byggðakvóta til fiskiskipa á fiskveiðiárinu 2007/2008 skuli framlengdur fyrir neðangreind byggðarlög. Athuga ber að umsóknarfrestur er til og með 1. september 2008, og vakin er athygli á að áður sendar umsóknir gilda áfram. Sveitarfélagið Árborg (Eyrarbakki) Sveitarfélagið Ölfus (Þorlákshöfn) Sveitarfélagið Gerðahreppur (Garður) Snæfellsbær (Rif og Ólafsvík) Grundarfjarðarbær (Grundarfjörður) Stykkishólmsbær

Vetrarstarfið hófst 18. ágúst og er safnið opnað kl. 15 alla virka daga. Á Bókasafni Grundarfjarðar er námsmönnum boðið upp á leiðsögn í notkun bókasafna og Gegnis sem er samskrá íslenskra bókasafna. Lesið meira um það og berjatínslu, kartöflur og sveppi á vefsíðunni.  Munið nýja slagorðið, “bókasöfnin – heilsulind hugans”  

    Þann 18. ágúst 1786, fyrir 222 árum síðan, gaf Danakonungur út tilskipun um að sex verslunarstöðum væri veitt kaupstaðarréttindi. Kaupstaðirnir voru Grundarfjörður, Reykjavík, Akureyri, Eskifjörður og Vestmannaeyjar. Kaupstaðirnir sex áttu að verðamiðstöðvar verslunar, útgerðar og iðnaðar hver í sínum landshluta. Auk þess áttu þeir að vera aðsetur ýmissa opinberra embættismanna og stofnana.