Nýtt deiliskipulag iðnaðarsvæðis vestan Kvernár

Nýtt deiliskipulag iðnaðarsvæðis vestan Kvernár, des. 2024. Uppdráttinn má nálgast í tillögugögnum, sjá neðar.

AUGLÝSING

Tillaga að nýju deiliskipulagi fyrir iðnaðarsvæðið vestan Kvernár í Grundarfjarðarbæ
ásamt umhverfismatsskýrslu

Á fundi sínum 12. desember 2024 samþykkti bæjarstjórn Grundarfjarðarbæjar að auglýsa tillögu að nýju deiliskipulagi fyrir iðnaðarsvæðið vestan Kvernár, ásamt umhverfismatsskýrslu skv. 41. gr. skipulagslaga nr. 123/2010 og 15 gr. laga um umhverfismat framkvæmda og áætlana nr. 111/2021.

Nýtt deiliskipulag mun taka við af gildandi deiliskipulagi fyrir iðnaðarsvæðið, en það er frá 1999 með nokkrum síðari breytingum.

Markmið og helsta breyting í nýju deiliskipulagi er að auka framboð á lóðum fyrir iðnaðarstarfsemi til framtíðar og tryggja hagkvæma nýtingu á landi, innviðum og jarðefnum. Aukin eftirspurn er eftir iðnaðarlóðum, sem nauðsynlegt er að verða við, fyrir þróun og uppbyggingu í sveitarfélaginu. Skipulag og uppbygging iðnaðarsvæðisins er mikilvægur þáttur til að styrkja undirliggjandi grunnþjónustu og fjölbreytni í atvinnusköpun og nýta vel auðlindir sem felast í notkun efnis af svæðinu til grjótnáms, áður en það er byggt upp. Þetta er eina iðnaðarsvæði Grundarfjarðarbæjar og því mikilvægt að nýta svæðið vel. 

Höfð var hliðsjón af umsögnum og athugasemdum sem bárust á fyrri stigum við gerð tillögunnar.

Hér má nálgast deiliskipulagstillöguna, en hún er sett fram í tveimur skjölum - smellið á viðkomandi hlekk:

• Greinargerð 
• Uppdráttur 

Tillagan er nú auglýst og er athugasemdafrestur við hana frá 14. desember 2024 til og með 29. janúar 2025. 

Tillagan er birt í Skipulagsgátt, www.skipulagsgatt og á vef bæjarins www.grundarfjordur.is í dag, auk þess sem hún liggur frammi útprentuð í Ráðhúsinu og á Bókasafni Grundarfjarðar á opnunartímum. 

Þau sem telja sig eiga hagsmuna að gæta eru hvött til að kynna sér tillöguna og senda athugasemdir gegnum skipulagsgáttina, www.skipulagsgatt.is (mál 937/2023) í síðasta lagi 29. janúar 2025. 

Í tengslum við gerð þessa deiliskipulags var auglýst breyting á Aðalskipulagi Grundarfjarðarbæjar (sept.-okt. 2024) sjá auglýsingu og skipulagsgögn hér. Aðalskipulagsbreytingin var samþykkt í bæjarstjórn að lokinni auglýsingu og var send til staðfestingar hjá Skipulagsstofnun í nóvember sl.  

Kynningarfundur/opið hús um deiliskipulagstillöguna verður haldið fyrrihluta janúar 2025 og verður auglýst síðar. 

Grundarfirði, 14. desember 2024

Sigurður Valur Ásbjarnarson,  
skipulagsfulltrúi Grundarfjarðarbæjar