Fréttir & tilkynningar

                                                            Guðrún Ósk Hrólfsdóttir hefur gengið í slökkvilið Grundarfjarðar. Þetta er í fyrsta skipti sem kona er skráð í slökkviliðið og því mikil tímamót. Á æfingu liðsins í síðustu viku mættu tveir nýliðar, þau Guðrún Ósk og Árni Þórarinsson. Á myndinni hér að ofan eru nýliðarnir komnir í fullan skrúða og tilbúnir að hefjast handa.

Dagana 6. – 8. október sl. buðu tónlistarkennarar Tónlistarskóla Grundarfjarðar foreldrum/forráðamönnum nemenda að heimsækja tónlistarskólann. Foreldrar sóttu þá hljóðfæratíma með börnum sínum og gafst kostur á að fylgjast með hvernig kennslan færi fram auk þess sem kennarar ræddu um æfingatíma, framfarir og fleira sem viðkemur tónlistarnámi barnanna.

Lögheimili manns er sá staður þar sem hann hefur fasta búsetu, sbr. lög um lögheimili nr. 21/1990. Samkvæmt lögum nr. 73/1952 um aðsetursskipti, ber íbúum að tilkynna um flutning til íbúaskrár innan viku frá flutningi, bæði flutning innanbæjar og milli sveitarfélaga. Tilkynna ber flutninga á bæjarskrifstofu Grundarfjarðar, þar er opið frá kl. 09:30-15:30 alla virka daga. Tilkynningarnar eru síðan sendar til Hagstofu Íslands. Eyðublöð er hægt að nálgast rafrænt hér.  

Í september var unnið með haustið í vinnustundum í Leikskólanum Sólvöllum. Byrjað var á því að fara í vettvangsferðir og umhverfið skoðað í haustlitunum. Safnað var saman  efnivið úr náttúrunni til að vinna með. Skipt var í hópa eftir aldri og var unnið verkefni um haustið eftir áhugasviði hvers hóps. 

Vakin er athygli á nýrri undirsíðu á Grundarfjarðarvefnum vegna Green Globe 21. Neðarlega til hægri er smellt á merki Green Globe 21 til að komast á síðuna. Á henni verða almennar upplýsingar og fréttir af Green Globe.  

  Green Globe 21 er alþjóðleg umhverfisvottunaráætlun sem vottar sjálfbæra ferðaþjónustu og samfélög.   Vefsíða Green Globe 21   Þátttakendur eru sveitarfélögin: Eyja- og Miklaholtshreppur Grundarfjarðarbær Helgafellssveit Snæfellsbær Stykkishólmsbær ásamt Þjóðgarðinum Snæfellsjökli     Skoða skýrsluna í heild  

49. fundur bæjarstjórnar verður haldinn í samkomuhúsinu á morgun, 14. október, kl.17.00. Á dagskrá eru m.a. fundargerðir nefnda og ráða,endurskoðuð fjárhagsáætlun 2004, kjör fulltrúa á aðalfund SSV, landsþing o.fl., kynning á ferð sveitarstjórnarmanna til Noregs, kynning á fyrirhugaðri menningarhátíð, ýmis gögn um Green Globe 21 og önnur gögn til kynningar. Fundurinn er öllum opinn. Bæjarstjóri  

Hagstofa Íslands hefur birt nýjar tölur um búferlaflutninga fyrir þriðja ársfjórðung ársins 2004. Fyrstu níu mánuði ársins urðu breytingar á íbúafjölda á Vesturlandi eftirfarandi: Brottfluttir umfram aðflutta á Vesturlandi voru 113. Á Akranesi fjölgaði um 27, í Borgarbyggð fækkaði um 33, í Stykkishólmi fækkaði um 25, í Snæfellsbæ fækkaði um 45 og í Grundarfirði voru brottfluttir umfram aðflutta 5, 59 voru aðfluttir og 64 burtfluttir. Vakin er athygli á því að fæðingar og andlát eru ekki inní þessum tölum.  

Sveitarfélögin fimm á Snæfellsnesi og Þjóðgarðurinn Snæfellsjökull hafa mætt viðmiðum GREEN GLOBE 21. Til stendur að veita sveitarstjórnunum BENCHMARKING (viðmiðunar) viðurkenninguna við hátíðlega athöfn á ferðasýningunni World Travel Mart þann 10. nóvember næstkomandi en sá dagur sýningarinnar er tileinkaður ábyrgri ferðaþjónustu.

Á lokahófi knattspyrnudeildar Víkings í Ólafsvík var Hermann Geir Þórsson valinn besti leikmaðurinn. Á sama tíma var lokahóf hjá 2.fl kvenna, sem kepptu undir merkjum HSH í sumar og þar var Berglind Ósk Kristmundsdóttir valin besti leikmaðurinn og systir hennar Birna Kristmundsdóttir valin efnilegust. Til hamingju með þetta !