Fréttir & tilkynningar

Jökull Helgason skipulags- og byggingafulltrúi verður í sumarfríi 7. júlí – 5. ágúst. Sindri Sigurjónsson leysir Jökul af á þeim tíma. Hægt er að ná í Sindra í síma 438 6630 eða 690 4343. Úttektir og eftirlit með byggingaframkvæmdum mun á þessu tímabili vera í höndum Dagbjarts Harðarsonar sem er í síma 863 4525.  

Á morgun 3. júlí kemur til Grundarfjarðarhafnar farþegaskipið Paloma. Skipið er frá Þýskalandi og er meðal tveggja stærstu skipanna sem koma til Grundarfjarðar í sumar. Farþegar skipsins eru um 310. Skipið staldrar stutt við, kemur kl. 08:00 og fer kl. 14:00.   Við komu skipsins mæta leikskólabörn niður á höfn og syngja nokkur lög. Kynningarbás verður á staðnum, þar sem farþegar og áhöfn geta fengið upplýsingar um það sem bærinn býður upp á. Áður en skipið siglir úr höfn verða tónlistaratriði á hafnarsvæðinu auk þess sem konur mæta í íslenska þjóðbúningnum. Grundfirðingar eru hvattir til þess að taka vel á móti fólkinu og vera bæ sínum til sóma.   Fyrir okkur sem verður ekki boðið um borð má sjá myndir og ýmsar upplýsingar um skipið á slóðinni http://www.hansatouristik.de Í valmynd til vinstri á síðunni er smellt á “Die Shiffe” og svo “MS Paloma” á valmyndinni sem þá birtist.  

Bygginganefnd íbúða aldraða mun standa fyrir kynningarfundi í Samkomuhúsinu, Sólvöllum 3, Grundarfirði mánudaginn 30. júní n.k. milli kl. 17 og 19. Þar sem kynntar verða nýtt raðhús sem Grundarfjarðarbær er að láta byggja að Hrannarstíg 28 - 40 í Grundarfirði, fyrir eldri borgara.  

Starfsmaður vikunnar í sumarvinnunni 16. – 20. júní var valinn af samstarfélögum sínum Gísli Valur Arnarsson. Gísli Valur er 15 ára og er sonur Sigríðar Gísladóttur og Arnar Jónssonar.   Við þökkum Gísla fyrir vel unnin störf og óskum honum til hamingju með tilnefninguna!!  

Framkvæmdarstjóri hátíðarinn þetta árið, Hrafnhildur Jóna, vinnur nú hörðum höndum að skipulagningu hátíðarinnar sem verður helgina 25. – 27. júlí. Drög að dagskrá er komin inn á síðuna, en nánari tímasetningar og fleira verður komið á hreint þegar nær dregur.  

Fimmtudaginn 19.júní kom fyrsta skemmtiferðaskip sumarsins til hafnar hér í Grundarfirði. Skipið heitir Funchal og er með þeim smærri sem koma til Grundarfjarðarhafnar þetta árið. Búið er að leggja mikla undirbúningsvinnu í það að taka vel á móti farþegum þeirra skemmtiferðaskipa sem hingað koma. Blíðskapar veður tók á móti gestum þessa fyrsta skips sumarsins, sem flestir voru franskir. Kynningarbás hafði verið komið fyrir niður við höfn þar sem fólk gat fengið upplýsingar um það sem um var að vera í bænum þennan dag. Það sem gestum var meðal annars boðið upp á var söngur leikskólabarna, sölubásar við höfnina, fólk í íslenska búningnum, hestasýning auk þess sem áhöfn skipsins mætti grundfirskum ungmennum í fótbolta. Ekki var annað að sjá en að fólk hafi verið mjög áhugasamt um það sem í boði var og allir sammála um að þessi frumraun hafi tekist vel og dagurinn vel heppnaður í alla staði. Hér að neðan má sjá myndir sem Ingi Hans Jónsson tók við komu skipsins. 

Síðastliðinn vetur var einn af valkostunum í félagsstarfi fyrir unglinga að ganga til liðs við unlingadeildina Pjakk, sem er deild á vegum Björgunarsveitarinnar Klakks. Starf unglingadeildar hafði legið niðri um skeið en í vetur var áberandi mikil gróska í starfinu og mikil ánægja hjá krökkunum í deildinni með starfið. Umsjón með starfi Pjakksins hafði Þorbjörg Guðmundsdóttir kennari við Grunnskólann, en starfið var hugsað fyrir nemendur í 9. og 10. bekk. Endapunktur vetrarstarfsins var óvissuferð krakkanna í maílok og fylgir hér á eftir ferðasagan.  

Mánudaginn 16. júní var haldinn framhaldsstofnfundur fyrir Eyrbyggju, sögumiðstöð, í Krákunni. Á fundinum var rakinn  undirbúningur að stofnun Eyrbyggju, sögumiðstöðvar. Megintilgangur hennar verður almenn fræðsla um sögu Snæfellsness og uppsetning sýninga í húsnæði sem keypt hefur verið fyrir starfsemina að Grundargötu 35.   Vel gengur að safna stofnframlögum sem eru nú liðlega 1,7 millj. kr. auk framlags sveitarfélagsins sem nemur 2 millj. kr. Hægt er að gerast stofnaðili út árið 2003.   Kosið var í fimm manna stjórn sem er skipuð þremur fulltrúum stofnaðila og tveimur fulltrúum tilnefndum af bæjarstjórn Grundarfjarðar. Af hálfu stofnaðila vou kjörin í stjórn þau Gísli Ólafsson, Jóna Björk Ragnarsdóttir og Ágúst Jónsson. Til vara eru Johanna E Van Schalkwyk, Guðjón Elisson og Guðmundur Gíslason.   Af hálfu bæjarstjórnar voru tilnefndir Björn Steinar Pálmason og Ragnar Elbergsson. Til vara eru Sigríður Finsen og Björg Ágústsdóttir.

Í gær, miðvikudaginn 18.júní, var opnun tilboða í endurbætur á kirkjugarðinum að Setbergi í Eyrarsveit. Þrjú tilboð bárust í verkið. Lægsta tilboðið var frá Dodds ehf. og hljóðaði það upp á 10.168.780 kr. sem er 108,3% af kostnaðaráætlun en kostnaðaráætlun við verkið var 9.392.263 kr. Önnur tilboð sem bárust voru frá Gráborg ehf. og Írakletti ehf.  

Hátíðardagskráin var með hefðbundnu sniði hér í Grundarfirði. Fyrir skrúðgöngu var börnum boðið upp á andlitsmálningu. Að því loknu hélt skrúðgangan með Lúðrasveit Grundarfjarðar í broddi fylkingar upp í þríhyrning.  Þórunn Kristinsdóttir flutti hátíðarræðu og fjallkona að þessu sinni var Sigríður Guðbjörg Arnardóttir. Pétur Pókus og Bjarni töframaður voru með skemmtun, söngatriði voru flutt og börnum var boðið að fara á hestbak. Það gekk á með hefðbundnum 17.júní skúrum en stytti upp þegar líða tók á daginn. Hátíðinni lauk svo með diskóteki fyrir börn og unglinga í þríhyrningnum. Hátíðin var í umsjá íþrótta- og tómstundanefndar Grundarfjarðar og eru henni, KFUM/K, unglingadeild Snæfellings, Sylvíu Rún og öðrum sem komu að hátinni færðar þakkir fyrir.