Fréttir & tilkynningar

Í þessari viku stendur yfir svokölluð kjördæmavika hjá þingmönnum.  Þessa viku nota þingmennirnir m.a. til þess að halda fundi með fulltrúum sveitarstjórna í kjördæmunum og fá upplýsingar um helstu verkefni og til þess að gefa sveitarstjórnum tækifæri til þess að ræða við sem flesta þingmenn kjördæmisins í einu um hagsmunamál sveitarfélaganna.   Fundur var haldinn með þingmönnum Norðvesturkjördæmis og fulltrúum sveitarstjórna í gamla Vesturlandskjördæmi þriðjudaginn 24. október sl. í Borgarnesi .  Af hálfu Grundarfjarðarbæjar sóttu fundinn Sigríður Finsen, forseti bæjarstjórnar og Guðmundur Ingi Gunnlaugsson, bæjarstjóri.  

Rétt svar við spurningu vikunnar er kex og vín. Biskví fyrir votaling sögðu krakkarnir og réttu upp fingur til að sýna hve margar kexkökur þau vildu fá í staðinn fyrir vettlinga og sokka sem konurnar í sveitinni prjónuðu til að geta boðið fransmönnum. 96 manns svöruðu spurningunni en 36 eða 40,6% voru með rétt svar.

Fimmtudaginn 26. október kl. 20:00 verður leiksýningin Patrekur 1,5 sýnd í Fjölbrautaskóla Snæfellinga. Sýningin er öllum opin og eru miðar seldir á skrifstofu skólans og við innganginn. Miðinn kostar 1.300 kr.    Rómafarar, nemendur í sögu 203 á vorönn 2007, verða með kaffisölu að sýningu lokinni.   

Síðastliðinn föstudag 20. október var haldinn stofnfundur Umhverfissjóðs Snæfellness og eru það sveitarfélögin á Snæfellsnesi sem standa að stofnun hans. Frumkvæði að stofnun sjóðsins hefur haft Guðrún Bergmann og fjölskylda hennar. Stofnframlag sjóðsins er minningarsjóður sem stofnaður var um Guðlaug Bergmann framkvæmdastjóra og frumkvöðul sem fæddur var 20. október 1938 og lést þann 27. desember 2004.  Markmið sjóðsins er að styrkja ýmis verkefni í umhverfis- og samfélagsmálum sem byggð eru á grunni sjálfbærrar þróunar í sveitarfélögunum fimm á Snæfellsnesi.   F.v. Erla Friðriksdóttir, Eggert Kjartansson, Guðrún Bergmann, Guðlaugur Bergmann, Sigríður Finsen og Kristinn Jónasson 

Þeir sem hafa flutt til Grundarfjarðar en ekki tilkynnt aðsetursskipti, eru hvattir til þess að gera það. Eyðublöð fást á bæjarskrifstofunni og einnig á vef Hagstofunnar, hagstofa.is Atvinnurekendur eru jafnframt hvattir til að brýna fyrir utanbæjarfólki, sem þeir ráða til starfa, að tilkynna aðsetursskipti ef búseta þeirra er í Grundarfirði. Nánari upplýsingar fást á bæjarskrifstofunni   Skrifstofustjóri 

Miðvikudaginn 18. október sl. fóru elstu nemendur leikskólans Sólvalla í heimsókn ásamt foreldrum í grunnskólann. Í árganginum eru 9 börn. Anna skólastjóri tók á móti börnunum, spjallaði við þau og sýndi þeim skólann. Farið var meðal annars í heimsókn inn í 1. bekk og verk- og listgreinastofurnar skoðaðar. Smíðastofan vakti mikla lukku þar sem nemendur í 2. bekk voru að smíða fallega gripi. Einnig var farið niður í tónmennt en þar vöktu trommurnar og allir hrisstuávextirnir mikla hrifningu.  Elsti árgangur leikskólans á eftir að fara í nokkrar heimsóknir í grunnskólann í vetur í tengslum við „Brúum bilið“ verkefnið sem verið hefur í gangi hér í Grundarfirði frá því 1998. Sjá myndir frá heimsókninni hér.

Á vegum Rökkurdaga er að ljúka ljósmyndasamkeppninni Mannlíf og umhverfi Grundarfjarðarbæjar.  Öllum er heimil þátttaka hægt er að senda inn bæði nýjar og gamlar ljósmyndir af mannlífi og/eða umhverfi Grundarfjarðarbæjar. Myndirnar verða svo til sýnis í Hrannarbúðinni á Rökkurdögum.  

35. hafnasambandsþing var haldið dagana 12.-13. október á Hótel Höfn, Hornafirði. Gísli Gíslason, hafnarstjóri Faxaflóahafna, var endurkjörinn formaður Hafnasambandsins til tveggja ára. Ásamt honum voru kjörin í stjórn: Björg Ágústsdóttir, Grundarfirði Björn Magnússon, Hafnasamlagi Norðurlands Helga Jónsdóttir, Fjarðabyggð Ólafur M. Kristinsson, Vestmannaeyjum Ólafur Örn Ólafsson, Grindavík Skúli Þórðarson, Húnaþingi vestra  

Töluverðar framkvæmdir eru nú við byggingar íbúðarhúsa í Grundarfirði. Við Ölkelduveg 1-7 er verið að byggja fjögurra íbúða raðhús, við Ölkelduveg 21 eru framkvæmdir hafnar við grunn fyrir einbýlishús, við Fellasneið 24 er einbýlishús orðið fokhelt, við Fellabrekku 7-21 er verið að efnisskipta lóðir fyrir byggingu fjögurra parhúsa og nýlega voru afhentar fjórar fullbúnar íbúðir við Grundargötu 69. Í myndabankanum má sjá myndir af íbúðarhúsum í byggingu sem teknar voru í blíðunni í gær, 18. okt.  

Kennsla hófst, að hluta, í nýju skólahúsnæði að Borgarbraut haustið 1960. Húsnæðið var fullgert í byrjun janúar 1962 og vígt formlega á þrettándanum. Flestir, eða 82%, svöruðu á þann hátt að fyrsti hluti skólans hafi verið tekin í notkun árið 1962.