Tvöhundruð og tuttugu ár liðin frá því Grundarfjörður fékk kaupstaðaréttindi.

Þann 18. ágúst 1786, fyrir 220 árum síðan, gaf Danakonungur út tilskipun um að sex verslunarstöðum væri veitt kaupstaðaréttindi. Kaupstaðirnir voru Grundarfjörður, Reykjavík, Ísafjörður, Akureyri, Eskifjörður og Vestmannaeyjar. Kaupstaðirnir sex áttu að verða miðstöðvar verslunar, útgerðarog iðnaðar hver í sínum landshluta. Auk þess áttu þeir að vera aðsetur ýmissa opinberra embættismann og stofnana.

Verslunarstaðurinn var þá á Grundarkampi og gerði séra Sæmundur Hólm, prestur á Helgafelli, uppdrátt af lóð kaupstaðarins og telst það vera fyrsti skipulagsuppdrátturinn sem gerður var hér á landi.

Hugmyndirnar hvað varðar Grundarfjörð gengu ekki allar eftir og svo fór að árið 1836 var gefin út tilskipun um að Reykjavík ein væri kaupstaður en hinir staðirnir fimm löggiltir verslunarstaðir. Engu að síður markar þessi dagsetning upphaf mikilla breytinga á Íslandi og er í raun sá dagur sem Grundfirðingar geta nefnt sinn afmælisdag.

Grundfirðingar, til hamingju með daginn.