06.11.2006
Stjórnsýsla - fréttir

Eins og öllum er vel kunnugt um gekk yfir mikið stórviðri í gær.  Þessu hafði verið spáð í síðustu viku og var m.a. birt viðvörun til íbúa Grundarfjarðar á heimasíðu sveitarfélagsins.  Segja má að fólk almennt hafi brugðist vel við og komið öllum lausum hlutum í skjól.  Þetta varð m.a. til þess að tjón varð minna en ella hefði getað orðið.  Bæjarstarfsmenn og hafnarvörður gerðu einnig það sem í þeirra valdi stóð.  Meðal annars fóru starfsmenn áhaldahússins um og bentu fólki á ef lausir munir voru úti.  Í höfninni var allt gert klárt á föstudag og laugardag. 

Þrátt fyrir þessar aðgerðir fór það svo að tjón varð á  þaki grunnskólans.  Um er að ræða þak sem til stóð að yrði yfir viðbyggingu við verknámsaðstöðuna en veggir voru óbyggðir.  Þakið fauk á sparkvöllinn og skemmdi grindverk umhverfis hann að hluta.  Einnig færðist til prammi í höfninni og smábátabryggjan fluttist til um breidd sína.  Unnið er að því að hreinsa upp brakið eftir þakið og smábátabryggjan verður síðar færð í sitt venjulega lægi.

Ástæða er til þess að þakka íbúum sveitarfélagsins fyrir góð viðbrögð og ekki síður björgunarsveit og starfsmönnum bæjarins sem stóðu vaktina í veðurhamnum alveg frá miðnætti á laugardag og fram að hádegi á sunnudeginum.

Aftur í fréttayfirlit