17.02.2010
Stjórnsýsla - fréttir

Fréttatilkynning frá skipulags- og byggingafulltrúa Grundarfjarðarbæjar

Langþráð tímamót eru staðreynd og er Aðalskipulag Grundarfjarðar 2003 - 2015, dreifbýlishluti, nú staðfest og orðið að veruleika.  Þetta er lokahnykkur í að aðalskipulag fyrir sveitarfélagið í heild sé í gildi.

Ferlið varðandi aðalskipulag þéttbýlis og dreifbýlis hefur staðið yfir með hléum frá árinu 1995 þegar vinna hófst við skipulag þéttbýlishlutans.  Því ferli lauk síðla árs 2003.  Fyrsta áfangaskýrsla skipulags dreifbýlishlutans var kynnt í bæjarráði þann 20. febrúar 2003.  Önnur skýrsla var kynnt bæjarstjórn 11. des 2003.  Þann 5. mars 2005 voru drög að aðalskipulagi kynnt samhliða íbúaþingi sem haldið var til að fá fram hugmyndir um málefni sveitarfélagsins.  Á þinginu voru 127 skráðir þátttakendur.  Skipulagstillagan var enn kynnt á almennum íbúafundi þann 9. maí 2006.  Í kjölfarið var tillagan til sýnis á bæjarskrifstofunni og á heimasíðu bæjarins og var gefinn kostur á leggja fram athugasemdir og ábendingar.  Þann 14. nóvember 2006 var skipaður starfshópur til þess að ljúka ferlinu um skipulagsvinnuna.  Starfshópurinn var í samráði og samstarfi við Teiknistofuna Eik á Ísafirði og voru gerðar smávægilegar breytingar og lagfæringar.  Erla Bryndís Kristjánsdóttir og Áslaug Katrín Aðalsteinsdóttir, landslagsarkitektar á Teiknistofunni Eik, eru höfundar að aðalskipulagstillögunni sem unnið var með.   Við tók samráðs- og athugunarferli með Skipulagsstofnun og fleiri aðilum sem gerðu nokkrar ábendingar sem tekið var tillit til.

 

Þann 12. nóvember 2009 samþykkti bæjarstjórn Grundarfjarðar lokagerð aðalskipulagstillögunnar og í kjölfarið áritaði Guðmundur Ingi Gunnlaugsson bæjarstjóri uppdrætti og greinargerðir.  Skipulagið var afgreitt af Skipulagsstofnun þann 18. desember 2009 og sendi það síðan til umhverfisráðherra til staðfestingar.  Umhverfisráðherra staðfesti síðan skipulagið þann 12. febrúar 2010 og lauk þar með farsællega löngu og ströngu ferli.

Aftur í fréttayfirlit