Listavinnuskóli í ágúst

Grundarfjarðarbær stendur fyrir skapandi listavinnuskóla í ágúst.

Listavinnuskólinn er unninn í samstarfi við Samtök Sveitarfélaga á Vesturlandi og er hluti af áhersluverkefni Sóknaráætlunar Vesturlands. Starfsfólk vinnuskóla er á aldrinum 13-16 ára (7. til 10. bekkur á komandi skólaári) og hafa þau starfað við fegrun og umhirðu svæða innan sveitarfélagsins, fyrr í sumar. Með Listavinnuskólanum gefst tækifæri til viðbótarvinnu við skapandi greinar og ætlar Grundarfjarðarbær að nýta tækifærið til að byggja upp og fegra miðbæjarsvæðið (kringum "víkingasvæði", Prjónað á plani, Mæstró og svæðið þar fyrir ofan). Ætlunin er að nýta hugmyndafræði sem kennd er við "torg í biðstöðu", sem snýst um að skapa meira líf og ánægjulegri nýtingu á svæðum, með tímabundnum lausnum - oft kallað að endurskilgreina svæði.

Markmið þessa verkefnis er að búa til enn skemmtilegra, hampa því óvænta, vera vettvangur róttækra tilrauna með umhverfið og gera svæði meira aðlaðandi þannig að fleiri vilji nýta.