Mynd af vef Umhverfis- og orkustofnunar, fulltrúar þátttakenda í ICEWATER verkefninu, samankomnir á vinnufundi 24. mars 2025.

Frábær þátttaka í upphafsfundi - ICEWATER verkefnið hafið

Byggt á umfjöllun í frétt á vef Umhverfis- og orkustofnunar

Um 80 manns tóku þátt í fyrsta fundi í ICEWATER verkefninu, en Grundarfjarðarbær er einn af 23 þátttakendum í þessu stóra verkefni. Fundurinn var haldinn dagana 24. og 25. mars 2025 í húsnæði Orkuveitu Reykjavíkur í Elliðaárdalnum. Fundurinn markaði upphaf þessa metnaðarfulla sex ára verkefnis, sem miðar að því að flýta fyrir og bæta innleiðingu vatnaáætlunar á Íslandi.

Eins og sagt var frá í frétt á vef bæjarins 11. desember 2024 hlaut Grundarfjarðarbær styrk uppá tæpar 2,3 milljónir Evra fyrir sínum hlut í verkefninu, eða hátt í 340 millj. ísl.kr. 

Markmið fyrsta fundar

Markmið fundarins var fyrst og fremst að hrista þennan stóra hóp saman og gefa þeim sem standa að verkefninu tækifæri til að hittast og ræða verkefnið. Farið var yfir ýmis hagnýt mál sem tengjast rekstri Evrópuverkefna og línurnar lagðar fyrir þá vinnu sem er framundan. 

Nanna Vilborg Harðardóttir, verkefnisstjóri skipulags- og umhverfismála, mun stýra verkefni Grundarfjarðarbæjar. Hún sótti fundinn ásamt Björgu Ágústsdóttur, bæjarstjóra.

Um verkefnið

ICEWATER verkefnið hlaut nýverið um 3,5 milljarð í styrk frá LIFE áætlun Evrópusambandsins og er þetta einn stærsti styrkur sem Ísland hefur fengið úr samkeppnissjóðum ESB.

Verkefnið er leitt af Umhverfis- og orkustofnun og er það unnið í nánu samstarfi við fjölbreyttan hóp íslenskra samstarfsaðila á borð við fagstofnanir ríkisins, sveitarfélög, opinber fyrirtæki og nýsköpunarfyrirtæki.

Þátttakendur

Þátttakendur í ICEWATER verkefninu eru:

Eimur, Gefn, Grundarfjarðarbær, Hafrannsóknastofnun, Heilbrigðiseftirlit Suðurlands, Hveragerðisbær, Isavia, Ísafjarðarbær, Kópavogsbær, Matvælastofnun, Náttúrufræðistofnun, Náttúruminjasafn Íslands, Orka náttúrunnar, Orkuveita Húsavíkur, Orkuveita Reykjavíkur, Reykjavíkurborg, Ríkisútvarpið, Samband íslenskra sveitarfélaga, Umhverfis- og orkustofnun, Umhverfis,- orku- og loftslagsráðuneyti, Veðurstofa Íslands, og Veitur. Einnig eru þrír óbeinir þátttakendur: Sveitarfélagið Bláskógabyggð, Grímsnes- og Grafningshreppur og Þjóðgarðurinn á Þingvöllum.