Hundagerði í Grundarfirði

Boð um afnot af hundagerði fyrir hundaleyfishafa í Grundarfirði

Nú hafa hundaleyfishafar í Grundarfirði aðgang að afgirtu og öruggu svæði þar sem hægt er að viðra hundana og leyfa þeim að leika sér frjálsir. 

Grundarfjarðarbær og landeigandi í Hálsi hafa gert samning um afnot af afgirtu svæði í landi Háls fyrir hundagerði. Svæðið var áður nýtt til búfjárhalds, þ.e.a.s. fyrir geitur, og er afgirt með hliði og aðgengilegt frá heimreið þar sem hægt er að leggja bílum.  

Hundaleyfishöfum í Grundarfjarðarbæ´, nú 51 talsins, stendur til boða að nýta svæðið, sem og eigendum hunda á lögbýlum, eða í samræmi við samþykkt um hundahald í Grundarfirði. 

Nú hafa hundaleyfishafar fengið sendan tölvupóst með frekari upplýsingum um svæðið og aðgengi að því. 

Á þjóðhátíðardeginum 17. júní verður svæðið formlega tekið í notkun og hefst hundapartýið kl. 17, sjá nánar í þjóðhátíðardagskrá Grundarfjarðarbæjar.

Um er að ræða tilraunaverkefni út þetta ár og að loknum samningstíma meta landeigandi og Grundarfjarðarbær hvernig til hefur tekist og hvernig framhaldið verður.

Með því að nýta svæðið samþykkir hundaeigandinn jafnframt að fylgja neðangreindum reglum, en svona þurfum við að ganga um svæðið:

• Lokum hliðinu á eftir hverjum hundi.
• Tökum upp skítinn eftir hundinn okkar og setjum í ruslatunnu.
• Skiljum ekki eftir rusl á eða við hundasvæðið.
• Komum bara með fullbólusetta hunda í hundagerðið.
• Ekki koma með tík á lóðaríi í hundagerðið.
• Skiljum hundinn aldrei eftir eftirlitslausan á hundasvæðinu.
• Komum ekki með grimman hund á svæðið. Sýni hundur árásargirni, þá yfirgefum við hundasvæðið (með hundinn) strax.
• Gætum þess að börn 12 ára og yngri séu í fylgd með fullorðnum.
• Taumskylda er utan svæðis.
• Við berum hvert um sig ábyrgð á okkar hundi – líka á hundasvæðinu. 

Vonast er til að þetta fyrirkomulag henti hundaeigendum vel.

Ábendingum um umgengni eða annað þessu tengt má beina í netfangið grundarfjordur@grundarfjordur.is

Sækja um hundaleyfi

Reglur um hundahald í Grundarfirði