Gjafir í tilefni aldarafmælis

Fulltrúar félagasamtaka, kirkju, dvalarheimilis og Grundarfjarðarbæjar ásamt Runólfi Guðmundssyni stjórnarformanni G.Run hf. föstudaginn 9. október 2020.
Mynd af Facebook-síðu G.Run. hf.

Í tilefni þess að 100 ár voru liðin frá fæðingu Guðmundar Runólfssonar, f. 9. október 1920, færðu eigendur fjölskyldufyrirtækisins Guðmundur Runólfsson hf. gjafir til góðra verkefna og félagasamtaka í bænum. 

Á Facebook-síðu fyrirtækisins segir að gjöfunum sé ætlað að nýtast í samfélaginu sem Guðmundur lagði mikinn metnað í að byggja upp. 

Það voru Ungmennafélag Grundarfjarðar, Setbergssókn, Dvalar- og hjúkrunarheimilið Fellaskjól, Björgunarsveitin Klakkur, Skotgrund - Skotfélag Snæfellsness, Golfklúbburinn Vestarr og verkefni um uppbyggingu útikennslu- og fjölskyldugarðs í Þríhyrningi, á vegum Grundarfjarðarbæjar, sem hlutu fjárstyrk. Styrkur til síðastnefnda verkefnisins á að renna til kaupa á leiktækjum fyrir unga sem aldna. 

Grundarfjarðarbær færir eigendum fyrirtækisins þakkir fyrir gjöfina.  Hér má lesa um verkefnið um uppbyggingu Þríhyrningsins í Grundarfirði.