Er lögheimilið þitt rétt skráð?

Mynd: Tómas Freyr Kristjánsson

Er lögheimilið rétt skráð?

Fyrir 1. desember þurfa allir að vera með lögheimili sitt rétt skráð á þeim stað sem þeir hafa fasta búsetu. Það er mikilvægt svo öll réttindi sem fylgja lögheimili séu tryggð.  Einnig er það mikilvægt fyrir sveitarfélagið, því það er í lögheimilissveitarfélaginu sem hver og einn á rétt á þjónustu og þangað renna útsvarstekjur fólks. 

Ert þú rétt skráð/skráður? - Hér er hægt að breyta lögheimili rafrænt.

Hvað er lögheimili?

Lögheimili er sá staður þar sem maður hefur fasta búsetu, skv. 2. gr. laga um lögheimili og aðsetur nr. 80/2018.

Athuga má sérstaklega, að nú er hjónum samkvæmt lögunum heimilt að skrá lögheimili á sitt hvorum staðnum. Um lögheimili sambúðarfólks fer skv. 5. gr. laganna og um lögheimili barna, fer skv. 6. gr. laganna.

Hvað er föst búseta?

Föst búseta er á þeim stað þar sem maður hefur bækistöð sína, dvelst að jafnaði í tómstundum sínum, hefur heimilismuni sína og svefnstaður hans er að jafnaði. 

Þetta þýðir að lögheimili manns skal jafnan vera þar sem hann býr á hverjum tíma. 

Er hægt að hafa lögheimili í hverskyns húsnæði?

Lögheimili skal skráð í tiltekinni íbúð eða húsi, við tiltekna götu eða í dreifbýli. Húsnæðið þarf að vera skráð sem íbúðarhúsnæði í fasteignaskrá Þjóðskrár Íslands (á byggingarstigi 4) og þarf að hafa fengið staðfang, sbr. 2. gr. laganna um lögheimili og aðsetur frá 2018.

Ennfremur er heimilt að skrá lögheimili á stofnunum fyrir aldraða, í búsetuúrræðum fyrir fatlað fólk og skilgreindum starfsmannabústöðum. 

Í annars konar húsnæði, s.s. sumarhúsum eða atvinnuhúsnæði, er ekki heimilt að skrá lögheimili sitt. 

Hvenær og hvar skal tilkynna flutning?

Tilkynna skal flutning innan 7 daga eftir að flutt er. Flutning er hægt að tilkynna rafrænt eða með því að mæta í afgreiðslu Þjóðskrár Íslands í Reykjavík eða á Akureyri. Vinsamlegast athugið að framvísa þarf löggildum skilríkjum: vegabréfi, íslensku ökuskírteini eða nafnskírteini.  Hér er hægt að breyta lögheimili rafrænt.