Dagskrá Rökkurdaga 2022

Mynd: Sigríður Diljá, frá Nýjubúð. Úr ljósmyndasamkeppni Grundarfjarðarbæjar 2019

Dagskrá Rökkurdaga 9. - 16. október 2022

Rökkrið læðir sér inn um fjörðinn okkar, sólin styttir veru sína í Grundarfirði og við sjáum seríurnar lýsa upp glugga heimamanna. 

Það er fátt betra en kertaljós, seríur og rómantískt andrúmsloft í rökkrinu! 

Menningarhátíðin Rökkurdagar 2022 verður haldin hátíðleg dagana 9. til 16. október nk. Hátíðin fór fyrst af stað árið 2001 og hefur verið fastur liður hér í Grundarfirði ár hvert í október- eða nóvember mánuði.

Hinir ýmsu viðburðir verða í boði sem ætti að höfða til sem flestra eins og t.d. söngur, hreyfing, fræðsla og skemmtun.

• Listasýning Leikskólabarna - Leikskólinn Sólvellir setur upp listasýningu í gluggum Kjörbúðarinnar
• Listasýning Eldhamra - Leikskóladeild Eldhamra setur upp sýningu í gluggum Sögumiðstöðvarinnar
• Ljósin í myrkrinu -  Kveikjum á hvítu seríunum, lýsum upp skammdegið og njótum fegurðarinnar
• Kaffi 59 - Hinir ýmsu viðburðir verða á Kaffi 59, má þar nefna Söngskemmtun, Karaoke og Bjór og Sálmar
• Rökkurquiz - Félagsmiðstöðin Eden opnar dyrnar upp á gátt og býður í sérstakt Rökkurquiz 
• Lasertag - Mót fyrir nemendur í 8. til 10. bekk
• Uppistand - Sóli Hólm kemur með sýninguna sína "Loksins eftirhermur"
• Og fleiri skemmtilegir viðburðir

Nánari dagskrá er að finna á FB síðu Rökkurdaga í Grundarfirði, hér.  En dagskrá er einnig hægt að sjá hér neðar í þessari frétt.

Dagskráin verður einnig borin út í hús í þéttbýli en hægt er að nálgast eintak á bókasafninu. Við hvetjum ykkur þó til þess að fylgjast vel með dagskránni á FB síðu Rökkurdaga þar sem dagskrá getur tekið breytingum með stuttum fyrirvara, þar sem einhverjir viðburðir eru háðir veðri. 

Einnig hvetjum við ættingja til þess að halda sínu fólki upplýstu sem ekki eru að nota rafræna miðla.

Rökkurlögin - Rafræn söngstund

Við megum til með að minna á Rökkurlögin, sem tekin voru upp fyrir Rökkurdaga 2020. Upptökur þar sem bæjarbúar sungu íslensk "rökkur" lög í tilefni Rökkurdaga. 

Hér er hlekkur á Youtube rás Grundarfjarðarbæjar, fyrir áhugasama.

Grundarfjarðarbær er svo sannarlega ríkur af hæfileikaríku fólki og erum við full þakklætis fyrir þeirra framlag til Rökkurdaganna 2020, sem yljar okkur enn um hjartarætur.