Fréttir & tilkynningar

Grundarfjarðarbær óskar eftir að ráða sem fyrst starfsmenn til að sinna ræstingu á tveimur af húseignum bæjarins. Um er að ræða 20 klst. á mánuði í hvorri húseign. Vinnutími er sveigjanlegur. Sami einstaklingur getur sinnt báðum störfunum.   Launakjör eru samkvæmt kjarasamningi Sambands íslenskra sveitarfélaga og Starfsmannafélags Dala- og Snæfellsness (SDS).   Nánari upplýsingar eru veittar á bæjarskrifstofu í síma 430 8500 eða á netfangi grundarfjordur@grundarfjordur.is   Umsóknarfrestur er til 29. október nk.   Sækja um ræstingastarf  

Bæjarráð Grundarfjarðar samþykkti bókun á fundi sínum þann 17. október sl. þar sem lýst var yfir áhyggjum vegna hægagangs stjórnvalda varðandi viðbrögð við mögulegum síldardauða í Kolgrafafirði. Bókunin er svohljóðandi:   „Bæjarráð Grundarfjarðar lýsir yfir áhyggjum vegna hægagangs stjórnvalda varðandi viðbrögð við mögulegum síldardauða í Kolgrafafirði. Á meðan nálgast síldin og bendir allt til þess að ekki verði minna um síld á svæðinu en verið hefur undanfarna vetur.    Á vegum umhverfisráðuneytis er unnið að gerð viðbragðsáætlunar um aðgerðir ef síld drepst í firðinum. Skynsamlegast er að koma í veg fyrir að slíkt geti gerst. Tilraunir til að fæla síld frá því að ganga inn í fjörðinn, t.d. með ljósum eða hljóðum hafa ekki skilað tilætluðum árangri. Eina leiðin til að tryggja að síld gangi ekki inn í Kolgrafafjörð er því að loka firðinum og koma þannig í veg fyrir mögulegt tjón sem gæti numið milljörðum króna fyrir þjóðarbúið.   Bæjarráð Grundarfjarðar skorar á ráðherra umhverfismála, sem jafnframt er sjávarútvegsráðherra að leyfa lokun fjarðarins strax. Kannað verði hversu langan tíma Vegagerðin þarf til framkvæmda sem nægja til að halda síld utan brúar. Um tímabundnar aðgerðir gæti verið að ræða, ef það er tæknilega mögulegt.   Mælingum sem nú fara fram er ætlað að varpa ljósi á áhrif þverunar fjarðarins á síldardauðann. Niðurstöður þeirra munu að líkindum ekki liggja fyrir fyrr en haustið 2014. Þá gæti stefnt í þriðja árið þar sem er hætta á síldardauða í Kolgrafafirði. Hér þarf að hafa hraðar hendur, enda var síldardauðinn síðastliðinn vetur skilgreindur sem náttúruhamfarir.“

Síðustu daga hafa þrettán nemendur frá Washington háskóla í Seattle dvalið í Grundarfirði ásamt kennara sínum. Í heimsókninni var unnið að verkefni tengdu Svæðisgarðinum í samstarfi við nemendur SFN. Í verkefninu var leitast við að svara spurningunni: Hvaða þýðingu hefur Svæðisgarðurinn fyrir ungt fólk á svæðinu og hverjir eru framtíðarmöguleikarnir? Nemendum var skipt niður í fimm hópa samkvæmt þemakorti Svæðisgarðsins og var rýnt í eftirfarandi þemu: matarkistan, sagnaarfur, sjósókn, friðlýst hús og kirkjur og að síðustu, landslag og leiðir. Meðal þess sem nemendur tóku sér fyrir hendur var hringferð um Snæfellsnesið, heimsókn til bænda, viðtöl við eldri borgara og ýmislegt fleira. Að lokum voru niðurstöður svo kynntar fyrir kennurum, fulltrúum Svæðisgarðsins og ráðgjafafyrirtækinu Alta. Yfirumsjón verkefnisins var í höndum Margaret Willson, mannfræðings, sem er mörgum Grundfirðingum kunnug, Johönnu Van Schalkwyk kennara í FSN ásamt aðstoð frá Lofti Árna Björgvinssyni enskukennara við FSN.

  Atvinnuráðgjafar SSV eru með viðveru í Grundarfirði yfir vetrarmánuðina. Fyrsti tíminn er á morgun 17. október frá kl 13.00 - 15.00

Þessi köttur er í óskilum hjá Áhaldahúsinu. Hafa má samband við Valgeir í síma: 438-6423 eða 691-4343.          

Fundi Heimilis og skóla, SAFT og Foreldrahúss, „Foreldrar og forvarnir“ er vera átti í Fsn í kvöld er frestað um óákveðinn tíma vegna veðurs og veðurútlits.  

Hringferð Heimilis og skóla, SAFT og Foreldrahúss.     Viltu vita hvað þú getur gert sem foreldri til að styðja barnið þitt í uppvextinum. Fjölmennum og finnum út hvernig við getum veitt styðjandi aðhald í uppeldi barna okkar.   Fundur fimmtudaginn 10. október í FSN kl 20.00    ATH að fundurinn er ætlaður foreldrum barna á öllum skólastigum; leik-, grunn- og framhaldsskóla.  

Hafin er vinna við gerð skólastefnu Grundarfjarðarbæjar. En hvað er skólastefna og til hvers er hún?   Í stuttu máli er skólastefna leiðarvísir um skólastarf í sveitarfélaginu. Í skólastefnu eru dregnar fram þær áherslur í skólamálum sem íbúar koma sér saman um. Skólastefna er grundvöllur fyrir ákvarðanatöku og skýrir hvaða leiðir á að fara til að ná áætluðum árangri.  

Bókasafnið er nú flutt í Sögumiðstöðina.   Opnum bókasafnið við Grundargötuna mánudaginn 7. október 2013.   Opið mánudaga-fimmtudaga kl. 14-18 fyrst um sinn.   Flutningum er ekki lokið en verið velkomin.  

Aðalfundur foreldrafélags Grunnskóla Grundarfjarðar og Leikskólans Sólvalla verður haldinn í grunnskólanum 8. október n.k. kl. 20:00.Á dagskrá verða venjuleg aðalfundarstörf sem og kynnt verður vinna sem hafin er við skólastefnu Grundarfjarðarbæjar.Nánari dagskrá verður send út þegar nær dregur.Stjórnir foreldrafélaganna við grunn- og leikskóla Grundarfjarðarbæjar