Fréttir & tilkynningar

Geysað hefur ofsaveður í Grundarfirði frá því í nótt.  Ekki eru líkur á því að veðrið gangi niður fyrr en seint á morgun, fimmtudag (milli kl. 17 - 18).  Allir þurfa að huga að húsum, bíkum og lausum munum og koma öllu í skjól sem mögulegt er.  Vindhviður hafa farið í 44 m/s og geta jafnvel orðið verri í nótt og fyrramálið og a.m.k. ekki minni.  Tilfinnanlegt tjón hefur þegar orðið á nokkrum  stöðum á lausum munum, bílum og húsnæði.  

Íþróttahúsið verður lokað í dag vegna veðurs. 

Gunnar Pétur Gunnarsson, slökkviliðsstjóri, er að hefja störf í álverinu á Reyðarfirði eftir fáa daga og verður þ.a.l. ekki lengur við störf fyrir slökkviliðið í Grundarfirði.  Gunnar hefur sagt stöðu sinni lausri sem slökkviliðsstjóri Grundarfjarðar.  Þangað til ráðið hefur verið í stöðu slökkviliðsstjóra, mun Valgeir Þ. Magnússon, varaslökkviliðsstjóri, stjórna slökkviliði Grundarfjarðar.   Gunnari Pétri eru þökkuð góð störf í þágu slökkvliðsins og óskað velfarnaðar á nýjum starfsvettvangi.

Dagana 4. og 5. október verður krabbameinsleit á Heilsugæslunni. Leitað verður að krabbameini í leghálsi og í brjóstum. Allar konur á aldrinum 20-70 ára með lögheimili hér, eiga nú að hafa fengið boðunarbréf í skoðunina. Þær sem ekki hafa fengið bréf er velkomið að hringja í síma 4306800 og panta tíma. Munið að ábyrgð á velferð fjölskyldunnar er ykkar, hvetjum allar konur til að vera með. Skoðunar læknir er Gunda Nygaard. Gæðin á brjóstamyndunum eru þau sömu og í Reykjavík og sömu læknar sem lesa úr þeim ( í Reykjavík).    

    Grundarfjarðarbær færði með liðsinni Heilsugæslustöðvar Grundarfjarðar, öllum Grundfirðingum sem fæddir voru árið 2006 sængurgjöf frá sveitungum sínum. Gjöfin innihélt m.a. fatnað, handklæði, beisli, fræðslubækur og pollagalla sem nauðsynlegur er öllum grundfirskum börnum! Þessi börn eru byrjuð í leikskólanum og hér má sjá nokkur þeirra í pollagöllunum sem voru í gjafapakkanum Á myndinni eru Jón Arnar, Alexander Freyr, Harpa Dögg, Isabella Rut, Anita Ósk og Andrea Ósk.

    Nýja Íslenska kvikmyndin Veðramót verður sýnd í sögumiðstöðinni um helgina. Veðramót er í leikstjórn Guðnýjar Halldórsdóttir og aðalleikarar í myndinni eru þau Ugla Egilsdóttir, Hilmir Snær Guðnason og Tinna Hrafnsdóttir. Kvikmyndin Veðramót var að stórum hluta tekin upp á Snæfellsnesinu.   Myndin fjallar um þrjá byltingarsinna sem fara norður í land og taka að sér stjórn á vistheimili fyrir vandræðaunglinga. Fljótlega uppgötva þau að hugsjónirnar sem þau lögðu upp með duga ekki alls staðar   Sýningar verða: Fimmtudag       kl. 21:00 Föstudag          kl. 21:00 Laugardag        kl. 21 :00 Aldurstakmark 16 ára 

Vantar einhverjum Snæfellsnesgalla ? Hægt er að panta galla hjá Eygló í síma 8630185. Barnastærðir kosta 5500 og fullorðinsstærðir eru á 6500.   

Hið árlega Steinþórsmót barna 14 ára og yngri í frjálsum verður haldið í dag. Mótið byrjar kl 17:30 og er skráning á staðnum. Frjálsíþróttaráð UMFG.

Knúið hefur verið á um það, að þingmenn Norðvesturkjördæmis komi til fundar við bæjarfulltrúa og bæjarstjóra Grundarfjarðarbæjar vegna þess hvernig byggðarlagið var haft útundan í ákvörðunum ríkisstjórnarinnar um mótvægisaðgerðir vegna skerðingar á þorskveiðiheimildum.  Stefnt er að því að slíkur fundur verði á morgun, fimmtudaginn 20. september kl. 09.00, í Hótel Hamri í Borgarbyggð.  Fundurinn verður haldinn þar vegna þess að þar verður aðalfundur Samtaka sveitarfélaga á Vesturlandi haldinn og hefst hann kl. 10.00.  Á fundi SSV verður einnig fjallað um kvótaskerðinguna.

Á fundi bæjarráðs Grundarfjarðarbæjar í gær, þ. 18. september, voru teknar ákvarðanir um mál sem munu marka nokkur tímamót í bæjarlífinu.  Í fyrsta lagi var ákveðið að ráða markaðsfulltrúa í þeim tilgangi að koma byggðarlaginu enn frekar "á kortið" eins og sagt er.  Markaðsfulltrúi mun sinna mörgum hliðum á almennri markaðssetningu byggðarinnar sem og mannlífi og starfsemi.  Í öðru lagi var samþykkt að ganga til samninga við ALTA ráðgjafarþjónustu um að fyrirtækið standi fyrir stefnumótun í ferðaþjónustu í Grundarfirði.  Vonir eru bundnar við það að slík stefnumótun muni leggja grunn að markvissri markaðssókn ferðaþjónustuaðila í byggðarlaginu til framtíðar.  Samþykkt var að hefja undirbúning að stofnun Vísindaseturs Breiðafjarðar sem hafi það að markmiði að vinna að rannsóknum og fræðslu um nýsköpun og auðlindastýringu á sviði náttúrufræða, m.a. jarðfræði með sjálfbæra þróun að markmiði.  Segja má að þessar tímamótaákvarðanir séu að hluta svar bæjarstjórnar Grundarfjarðarbæjar við því að byggðarlagið var ekki haft með í ákvörðunum ríkisstjórnarinnar um mótvægisaðgerðir vegna skerðingar á þorskveiðiheimildum.  Bæjarstjórnin mun sjálf leggja sig fram um að vinna sem best að mótvægisaðgerðum heima fyrir hvernig sem fer endanlega um aðgerðir ríkisvaldsins.