Aðsóknarmet í Sögumiðstöðinni í Grundarfirði

Fimmtán ára strákur úr Grafarvogi, Ívar Smárason, varð fimm þúsundasti gesturinn í Eyrbyggju Sögumiðstöð þetta sumarið.  Ívar var á ferðalagi ásamt foreldrum sínum og bróður og annarri fjölskyldu.  Þau höfðu varið verslunarmannahelginni í blíðu og góðu yfirlæti á tjaldstæðinu í Grundarfirði og komu við í Sögumiðstöðinni áður en haldið var heim á leið. 

Á myndinni sést hvar Ingi Hans Jónsson  forstöðumaður afhendir Ívari stóra Macintosh dós, í tilefni af því að hann var fimmþúsundasti gestur sumarsins.  Einnig var honum boðið upp á veitingar á Kaffi Emil.

Ívar og samferðafólk hans nutu leiðsagnar um sýningar Sögumiðstöðvar og höfðu öll gaman af, þó hópurinn væri á ólíkum aldri, barn, fullorðnir og tveir unglingar.    

Talsverð aukning er á gestakomum í Sögumiðstöð milli ára í þá tvo mánuði sem miðstöðin hefur verið opin í sumar. Íslenskum ferðamönnum hefur fjölgað um 49% og erlendum um rúm 84%.  Með því að fjöldi gesta í júní og júlí er nú kominn yfir 5000, er þetta aðsóknarmet miðað við gestafjölda að sumri, allt frá því að Sögumiðstöðin hóf starfsemi sína árið 2003.