Fréttir & tilkynningar

  Vinnuverndarvikan 2007 verður 22. til 26. október næstkomandi. Vikan fjallar að þessu sinni um orsakir líkamlegra álagseinkenna s.s. verki í baki, hálsi og herðum.   Hápunktur vikunnar er ráðstefnan Hæfilegt álag er heilsu best sem fjallar um varnir gegn líkamlegum álagseinkennum. Ráðstefnan verður á Grand Hótel 23. október kl. 13.00 – 16.00, hún er öllum opin og aðgangur ókeypis. Þátttaka tilkynnist til Vinnueftirlitsins í síma 550 4600 eða á netfangið gudrun@ver.is. Dagskrá ráðstefnunnar má sjá hér www.vinnueftirlit.is.

Yfirskrift Málþingsins er Maður brýnir mann - Samskipti Umhyggja Samábyrgð. Málþingið er vettvangur þeirra sem vilja koma rannsóknum, þróunar- og nýbreytnistarfi á framfæri til þeirra fagstétta sem starfa við menntun og þjálfun. Á málþinginu eru leikskólastjórar Leikskólans Sólvalla með kynningu á þróunarverkefninu ,,Ég og leikskólinn minn" Ferlimöppur til að skapa markvisst upplýsingaflæði milli skóla og heimilis.   Nánar um málþingið http://www.khi.is/?q=malthing2007

Undirbúningsvinna fyrir Rökkurdaga er á fullu þessa dagana. Fólk sem hefur áhuga á að koma inn efni eða hefur góðar hugmyndir að slíku er beðið að hafa samband hið snarasta. Vinsamlegast hafið þá samband við Inga Hans í síma: 893-7714 eða Ragnheiði í síma: 847-7140

Það er farið að kólna í veðri og það þýðir að styttast fer í að sundlauginni verði lokað. Síðasti opnunardagur þetta haustið verður föstudagurinn 19. október. Opið verður til kl. 20.00. Þannig að það er um að gera að nýta þessa örfáu daga sem eftir eru og drífa sig í sund í góða veðrinu.

Útbúin hefur verið ný gönguleið í grunnskólann fyrir skólabörnin sem búa á Hjaltalínsholtinu og þar í grennd.  Gönguleiðin liggur meðfram Ölkelduvegi að Hrannarstíg og svo meðfram Hrannarstígnum að Smiðjustíg.  Reiknað er með að börnin gangi svo meðfram Smiðjustígnum í skólann og sömu leið til baka.  Settar hafa verið gangbrautir á Ölkelduveginn og Hrannarstíginn þar sem eðlilegast er að fara yfir þessar götur á gönguleiðinni.  Þetta er gert núna til þess að börnin þurfi ekki að ganga alla leiðina eftir og meðfram Ölkelduvegi sem nú er illa fær vegna bygginga- og gatnaframkvæmda.  Framkvæmdirnar gera það að verkum í vetur að ekki verður unnt að leggja varanlega gangstétt meðfram Ölkelduveginum fyrr en næsta sumar í fyrsta lagi.  Foreldrar eru eindregið hvattir til þess að leiðbeina börnunum og vísa þeim á gönguleiðina.

Síldveiðiskipið Krossey SF 20 frá Hornafirði fékk 650 tonn af síld rétt fyrir utan Grundarfjörð í gærkvöldi og í dag. Jón Þorsteinsson háseti á Krossey sagði í samtali við Skessuhorn að þetta væri fín síld og fer hún öll til manneldis. “Við tókum fimm köst og í fyrsta kastinu voru einungis 50 tonn en í síðasta kastinu fengum við 200 tonn.” Segir Jón að Krosseyin sé nú á leið með aflann til vinnslu á Hornafirði. ,,Það er mikið minna af síld núna í Grundarfirðinum en í janúar síðastliðnum þegar við vorum þar síðast á veiðum. En við erum líka mikið fyrr á ferðinni. Við höfum einnig orðið varir við síld út af Vestmannaeyjum,” bætir Jón við. Hann segir óvíst um hvort skipið taki næsta túr á Grundarfjörð. “Ætli við prófum ekki að finna síld fyrir sunnan landið. Það er mikið styttra stím fyrir okkur á miðin,” sagði Jón.   Á myndinni er Krosseyin að taka síðasta kastið og dælir síldinni um borð. Í því voru 200 tonn af úrvalssíld sem öll fer til manneldis.   Sjá greinina á www.skessuhorn.is

Vakin er athygli þeirra sem hyggjast sækja um styrki af einhverju tagi til Grundarfjarðarbæjar á næsta ári, að umsóknarfrestur hefur verið auglýstur og er til og með 24. október n.k.  Ekki eru sérstök eyðublöð fyrir umsóknir.  Unnt er að senda umsóknir ásamt skýringum í bréfi til skrifstofu Grundarfjarðarbæjar, Grundargötu 30, 350 Grundarfjörður. 

Bókasafn Grundarfjarðar á þær 7 skáldsögur eftir Doris Lessing sem þýddar hafa verið á íslensku og að auki bókina Vinter in July á ensku. Lessing skrifar um reynsluheim kvenna og þykir hafa mjög sérstakan húmor. Bækur Doris Lessing og myndverkið Sýn eftir elstu börn Leikskólans Sólvöllum vorið 2001 en þá flutti bókasafnið í nýtt húsnæði ofan á vélaverkstæði Bærings. 

 Af vef Skessuhorns: 12. október 2007 Í gærkvöldi hélt sautján manna stórsveit Samúels Samúelssonar fjölmenna “funk” tónleika í Fjölbrautaskólanum í Grundarfirði. Mikil stemning myndaðist meðal áhorfenda sem voru vel með á nótunum allt kvöldin og ekki spillti spilagleði stórsveitarinnar fyrir og var því sannkölluð ,,Fnyk” stemning í skólanum. Stórsveitin lék tónlist af nýútkomnum diski sínum sem heitir einmitt Fnykur. Samúel Jón Samúelson sagði í samtali við Skessuhorn að hann væri virkilega ánægður með viðtökurnar í Grundarfirði. “Hér komu miklu fleiri til að hlusta á okkur en á tónleikunum sem við héldum í Reykjavík kvöldið áður og þá er óþarfi að vera að vitna í neinar höfðatölur,” sagði Sammi.  

Stórsveit Samma mætir til Grundarfjarðar og heldur tónleika í sal framhaldsskólans á fimmtudagskvöld. Samúel Samúelsson, kenndur við Jagúar, er stjórnandi þessarar sveitar sem hefur á að skipa 20 mjög svo færum hljóðfæraleikurum og leika þeir lög úr ýmsum áttum.   Tónleikarnir hefjast 20:00 og kostar aðeins 2000 kr. inn en framhaldsskólanemar og grunnskólanemar fá miðann á 1500 kr.