Skipulags- og umhverfisnefnd

Almenna umhverfisþjónustan ehf. sækir um stöðuleyfi til 12 mánaða fyrir tvo 40 feta gáma á lóð sinni, Ártúni 1. Fyrirhugað er að byggja nýtt hús á lóðinni en óskað er eftir stöðuleyfi gáma til bráðabirgða.

Í lið 3.4 í greinargerð með gildandi deiliskipulagi frá 1999 segir: "Á lóðum er óheimilt að geyma gáma. Þó getur lóðarhafi sótt um stöðuleyfi fyrir gáma til skipulags- og byggingarnefndar. Gámar með slíkt leyfi mega að hámarki standa á lóð í 1 mánuð og skulu þá fjarlægðir." Í breytingu á deiliskipulaginu frá 2015 er ekki vikið frá þessu ákvæði.

Bongó slf. sækir um tímabundið stöðuleyfi fyrir matarvagn sem staðsettur verður á Grundargötu 33, miðbæjarsvæði, líkt og fyrri ár. Umrætt tímabil er frá 15. maí til 15. september 2022.

Vegna aukinnar eftirspurnar eftir lóðum á iðnaðar- og athafnasvæðinu vestan Kvernár, leggur skipulagsfulltrúi til að skipulag og lóðamöguleikar á svæðinu verði teknir til áframhaldandi skoðunar og forvinnu. Deiliskipulag svæðisins er frá 1999 með síðari breytingum frá 2006 (Ártún 1-6), 2015 (Ártún 1) og 2020 (Ártún 3). Mikilvægt er að lóðirnar sem skipulagið gerir ráð fyrir séu tiltækar og mæti þörfum dagsins í dag.

Forsaga málsins:
Þann 14. janúar 2021, fól bæjarstjórn skipulags- og umhverfisnefnd að skoða gildandi deiliskipulag á iðnaðarsvæðinu með tilliti til ábendingar sem fram kom í minnisblaði um efnistökumál/efnisnámu í Lambakróarholti, dags. 14.01.2021 þar sem fjallað er um iðnaðarsvæðið (merkt I-1 í nýja aðalskipulaginu) og Lambakróarholtsnámu (merkt E-3 í aðalskipulaginu nýja).

Á 224. fundi sínum þann 27. janúar 2021, tók skipulags- og umhverfisnefnd vel í erindið og fól skipulags- og byggingarfulltrúa að hefja vinnu við endurskoðun á deiliskipulagi fyrir iðnaðarsvæðið.

Í fundargerð frá fundi ráðgjafarfyrirtækisins Alta með skipulags- og byggingarfulltrúa þann 2. febrúar 2021, var gerð grein fyrir forsendum frekari breytingar á deiliskipulaginu ásamt umræðupunktum og er fundargerðin lögð hér fram til grundvallar áframhaldandi vinnu við deiliskipulagsbreytinguna.

Ekki voru áætlaðir fjármunir í vinnu vegna breytingar á deiliskipulaginu á þessu ári. Engu að síður telur skipulagsfulltrúi að mikilvægt sé að hefja endurskoðun á deiliskipulaginu sem fyrst.

Skipulagsfulltrúi kynnti grófa verk- og tímaáætlun vegna fyrirhugaðrar vinnu við deiliskipulag Framness og hafnarsvæðis austan Nesvegar og sagði frá öflun tilboða og vali á ráðgjafarstofu vegna þessarar vinnu.

Lögð fram til kynningar endurbætt tillaga að útsetningu nýrra lóða vestan við Dvalar- og hjúkrunarheimilið Fellaskjól, eftir samráð við fulltrúa úr stjórn Fellaskjóls. Breytingarnar fela í sér: fækkun íbúðareininga um eitt (úr 8 einingum í 7), fækkun bygginga úr þremur í tvær, örlitla hliðrun bygginga innan lóðar þannig að fjögurra eininga raðhús er miðjusett á Fellaskjólsbygginguna. Jafnframt er akfæra göngustígnum hliðrað örlítið.

Fannar Þór Þorfinnsson vék af fundi undir þessum lið.

Lagðar fram til kynningar tillögur að nýjum lóðarblöðum fyrir Sæból 1-11, Sæból 13, Grundargötu 40-42 og Eyrarveg 12-18.

Á vegum skipulags- og umhverfissviðs fer fram vinna við að mæla upp lóðir í Grundarfirði, einkum í tengslum við endurnýjun á lóðarleigusamningum sem eru að renna út. Fyrsti liður í þeirri vinnu var að mæla upp lóðir á reit sem afmarkast af austurhlið lóðar FSN, Grundargötu, Eyrarvegi og Sæbóli. Lóðirnar voru mældar upp af nýrri loftmynd í mjög góðri upplausn og voru lóðarmörkin dregin með tilliti til núverandi notkunar, gróðurs og girðinga á svæðinu.

Við uppmælinguna kom í ljós að stærð lóða í lóðarleigusamningum er víða ekki í samræmi við núverandi notkun lóða og er því lagt til að mörkin verði löguð að raunstærð á nýjum lóðarblöðum með tilheyrandi leiðréttingu á stærðum lóða. Fyrir liggur að byggingarfulltrúi er einn lóðarhafa og kemur hann því ekki að undirbúningi eða afgreiðslu þessa máls.

Á 258. fundi bæjarstjórnar þann 6. apríl 2022 samþykkti bæjarstjórn Grundarfjarðarbæjar að fela skipulagsfulltrúa að kynna fyrir lóðarhöfum niðurstöðu uppmælinga og nýja afmörkun lóðarmarka fyrir Sæból 1-11, Sæból 13, Grundargötu 40-42 og Eyrarveg 12-18.

Ennfremur var skipulagsfulltrúa falið að ganga frá endanlegum lóðarblöðum, eftir atvikum að fengnum sjónarmiðum lóðarhafa, til endanlegrar staðfestingar og undirritunar bæjarstjóra sem skal jafnframt undirrita og ganga frá lóðarleigusamningum í samræmi við breytingar.


Að loknum þessum dagskrárlið kom Fannar Þór Þorfinnsson aftur inn á fundinn.

Lagt fram til kynningar erindi frá stjórn verkefnisins "Römpum upp Ísland", sem jafnframt var lagt fram á 259. fundi bæjarstjórnar þann 7. apríl sl.

Bæjarstjórn fól þá umhverfis- og skipulagssviði að skrá sveitarfélagið til þátttöku í verkefninu "Römpum upp Ísland" og í framhaldinu að athuga hugsanlega styrki til þess að framkvæma úttekt á aðgengismálum í og við opinberar byggingar og mannvirki í sveitarfélaginu.

Staða mála í vinnslu hjá skipulags- og umhverfissviði.

Halldóra Hreggviðsdóttir, jarðfræðingur og hagverkfræðingur og ráðgjafi hjá Alta, kynnti hugmyndafræði og útfærslur blágrænna ofanvatnslausna.

Bæjarfulltrúum hafði verið boðið að sitja fund skipulags- og umhverfisnefndar undir þessum síðasta lið á dagskrá, vegna kynningar Halldóru og umræðna að kynningunni lokinni.