Fellabrekka 7-13 - Umsókn um lóð

Skipulags- og umhverfisnefnd samþykkir að úthluta umsækjanda lóðunum við Fellabrekku 7-13, til íbúðarbyggingar, sbr. samþykkt um úthlutun lóða í Grundarfirði og skilmála um afslátt af gatnagerðargjöldum frá 14. desember 2023.

Skipulags- og umhverfisnefnd samþykkir samhljóða, með vísan í 2. mgr. 36. gr. skipulagslaga, að gera eftirfarandi breytingu á Aðalskipulagi Grundarfjarðar 2019-2039:

Eftirfarandi skipulagsákvæði fyrir íbúðarsvæði ÍB-3 breytist úr:

„Fellabrekka 7-9: Heimild er til að byggja allt að 3ja íbúða hús á lóðunum sameiginlega, eða parhús og einbýli á lóðunum tveimur.“
í:
„Fellabrekka 7-13: Heimilt er að byggja allt að 8 íbúðum samtals, á 2 hæðum í fjölbýli eða sérbýli.

Önnur ákvæði íbúðarreitsins haldast óbreytt.

Breytingin telst óveruleg með eftirfarandi rökum:
- Ekki er um breytingu á landnotkun að ræða.
- Áformað byggingarmagn og hæð húsa er í samræmi við aðliggjandi byggðarmynstur og það sem vænta mátti á reitnum skv. gildandi aðalskipulagi, þó svo íbúðum fjölgi og húsagerð breytist.
- Aukin umferð í götunni, vegna fleiri íbúða, mun hafa lítil áhrif á núverandi hús þar sem þau eru innst í botngötunni. Auk þess eru aðstæður þannig að aðeins er byggt öðrum megin götunnar.
- Breytingin er því ekki talin líkleg til að hafa mikil áhrif á einstaka aðila eða á stórt svæði.

Þegar aðalskipulagsbreytingin hefur verið staðfest verði byggingarleyfisumsókn fyrir Fellabrekku 7-13 grenndarkynnt á grundvelli 44. gr. skipulagslaga.

Skipulagsfulltrúa er falið að ganga frá tillögu að óverulegri breytingu aðalskipulags skv. framangreindu til auglýsingar og meðferðar skv. 2. mgr. 36. gr. skipulagslaga.

Þegar teikningar berast frá lóðarhafa verða þær teknar til afgreiðslu í nefndinni, með grenndarkynningu í huga.

Á 257. fundi sínum þann 21. mars sl. samþykkti skipulags- og umhverfisnefnd að úthluta lóðunum við Fellabrekku 7, 9, 11 og 13 sameiginlega til byggingar fjölbýlishúss á lóðunum. Ennfremur samþykkti nefndin að breyta skipulagsákvæðum fyrir svæðið ÍB-3 þannig að byggja mætti allt að 8 íbúðir sameiginlega á lóðunum á tveimur hæðum, og taldist breytingin óveruleg þar sem byggingarmagn og hæð húsa væri í samræmi við aðliggjandi byggðamynstur, og að aukin umferð um götuna myndi hafa óveruleg áhrif á núverandi hús þar sem þau væru innar í botnlanganum. Skipulagsstofnun staðfesti breytinguna með bréfi þann 23. maí sl. og hefur breytingin verið birt.

Farið yfir uppdrættina og tekin ákvörðun um grenndarkynningu.

Ekki liggur fyrir deiliskipulag fyrir lóðirnar. Skipulags- og umhverfisnefnd fór yfir framlagðan aðaluppdrátt og samþykkir fyrir sitt leyti að grenndarkynning fari fram.

Nefndin felur því skipulagsfulltrúa að grenndarkynna byggingaráformin fyrir eigendum lóðanna Fellabrekku 5, 15, 17, 19 og 21, Fellasneið 2, 4, 10 og 14 og Hellnafelli 2, í samræmi við 1. mgr. 44. gr. skipulagslaga nr. 123/2010 m.s.br, en með fyrirvara um lagfæringu á aðaluppdrætti hvað varðar stærðir lóða og útreiknað nýtingarhlutfall.

Skipulags- og umhverfisnefnd hefur farið yfir innsenda athugasemd úr grenndarkynningu. Í fylgiskjali er að finna svör nefndarinnar sem nefndin samþykkir samhljóða og kemur m.a. á framfæri við framkvæmdaraðila.

Í ljósi framangreinds samþykkir skipulags- og umhverfisnefnd að fela byggingarfulltrúa að gefa út byggingarleyfi að uppfylltum skilyrðum 2.4.4. gr. í byggingarreglugerð nr. 112/2012 m.s.br. skv. framlögðum aðaluppdrætti dags. 1.8.2024, enda eru áformin í samræmi við landnotkun, byggðamynstur og þéttleika byggðar, sbr. 44. gr. skipulagslaga og áður staðfesta aðalskipulagsbreytingu.