Máli bætt við dagskrá fundarins, en 25. mars sl. var birt í Samráðsgátt mál frá atvinnuvegaráðherra, drög að frumvarpi til breytinga á lögum um veiðigjald (mál nr. S-62/2025).
Umsagnartími er skammur, eða rúm vika - til 3. apríl nk. Ljóst er að ekki næst að setja málið á dagskrá bæjarstjórnarfundar áður en sá frestur rennur út.
Bæjarstjóri sagði frá því að eftir hádegi í dag hafi verið boðað til fundar með fulltrúum allra sveitarfélaga í Samtökum sjávarútvegssveitarfélaga og muni hún sitja þann fund.
Á landsvísu hefur sjávarútvegur afar mismunandi vægi í útsvarsgrunni sveitarfélaga, allt frá því að hafa ekkert vægi upp í það að vega allt að 50% útsvarstekna, þegar vægi veiða og vinnslu eru lögð saman. Grundarfjarðarbær er í fjórða til fimmta sæti þeirra sveitarfélaga þar sem fiskveiðar og vinnsla hafa mesta vægið í útsvarstekjunum.
Ljóst er því að umfangsmiklar breytingar sem snerta sjávarútveg eru líklegar til að hafa mun meiri áhrif á Grundarfjarðarbæ en mörg önnur sveitarfélög.
Í því ljósi gerir bæjarráð alvarlegar athugasemdir við þann skamma tíma sem gefinn er til umsagna um málið í Samráðsgátt.
Grundarfjarðarbær gerir einnig athugasemd við að framlögð frumvarpsdrög séu kynnt án þess að fyrir liggi nánari greining á áhrifum boðaðra lagabreytinga fyrir sveitarfélögin og tekjustofna þeirra, s.s. eftir samsetningu tekna sveitarfélaga, umfangi greina sjávarútvegs í atvinnulífi sveitarfélaga, samsetningu eða tegundum sjávarútvegsfyrirtækja o.fl.
Gerð er alvarleg athugasemd við þá fullyrðingu í kafla 6.4. í frumvarpinu, þar sem segir að með vísan til umfjöllunar í kafla 6.3 um áhrif frumvarpsins á samkeppnishæfni og rekstrarskilyrði sjávarútvegsfyrirtækja „verði að telja að frumvarpið verði það að lögum muni hafa óveruleg áhrif á þau byggðalög þar sem sjávarútvegsfyrirtæki eru staðsett“.
Með hliðsjón af því sem áður er sagt um vægi sjávarútvegs í Grundarfirði er kallað eftir upplýsingum sem þarna búa að baki eða sem skýra þetta.
Bæjarstjóra er falið að leggja inn umsögn í samráðsgáttina.
Samþykkt samhljóða.